Njerëzit me sklerozë të shumëfishtë (MS) kanë qenë të shqetësuar se një infeksion COVID-19 mund të shkaktojë që simptomat e sëmundjes së tyre nervore të përkeqësohen edhe më shumë.
Por një studim i ri duhet të ofrojë pak ngushëllim – COVID-i nuk duket se e përkeqëson MS-në, raportuan studiuesit.
“Infeksionet mund të shoqërohen me më shumë paaftësi tek njerëzit me MS”, tha studiuesja Amber Salter. “Sidoqoftë, studimi ynë zbuloi se për infeksionet COVID-19 në mënyrë specifike, kjo nuk ishte e vërtetë”.
“Ky është një lajm i mirë për njerëzit me MS, se ata nuk kanë nevojë të shqetësohen për përkeqësimin afatgjatë të simptomave të tyre të MS pas një infeksioni COVID-19”, shtoi Salter.
Studimet e mëparshme treguan se infeksioni COVID mund të shkaktojë përkeqësimin e simptomave të MS, veçanërisht nëse simptomat përkojnë me ato që lidhen me COVID-in e gjatë, shkruan Healthday, transmeton Gazeta Shneta.
Për këtë studim të ri, studiuesit gjurmuan më shumë se 2,100 pacientë me MS për më shumë se 18 muaj. Rreth 37% e pacientëve ishin të infektuar me COVID.
Pacientët raportuan ashpërsinë e simptomave të tyre të MS të paktën gjashtë herë gjatë studimit. Këto simptoma mund të përfshijnë dobësi të muskujve, ndryshime në shikim dhe mpirje.
Pacientët u pyetën gjithashtu për simptoma të tjera si aftësia e ecjes, funksioni i duarve, dhimbjet e trupit, lodhja dhe problemet me kujtesën dhe të menduarit.
Rezultatet nuk treguan dallime domethënëse në simptomat e MS midis njerëzve që ishin infektuar me COVID dhe atyre që nuk ishin infektuar.
Infeksioni COVID gjithashtu nuk shkaktoi paaftësi më të madhe në mesin e pacientëve me MS, thanë studiuesit.
“Studimi ynë tregon se infeksioni COVID-19 nuk u shoqërua me ndryshime të menjëhershme në ashpërsinë ose paaftësinë e simptomave, as nuk ndryshoi simptomat e MS ose trajektoren e paaftësisë për më shumë se një vit e gjysmë pas infeksionit”, tha Salter.
Megjithatë, studiuesit vunë në dukje se ky studim u fokusua në pacientët e moshuar me MS me një moshë mesatare 65 vjeç.
“Ndërsa studimi ynë shikoi kryesisht njerëzit e moshuar dhe rezultatet mund të mos jenë të njëjta për të rinjtë, këto gjetje na ndihmojnë të kuptojmë më mirë se si ky lloj infeksioni mund të prekë njerëzit me MS”, përfundoi Salter. /Gazeta Shneta/