Një studim i kryer nga kërkues në London School of Economics, New York University dhe Universitetin e Oxfordit ka treguar se modelet e inteligjencës artificiale (AI) mund të parashikojnë me saktësi më të lartë korrelacionet mes përgjigjeve të individëve në pyetjet e testeve të personalitetit, krahasuar me njerëzit.
Studiuesit përdorën një platformë të quajtur PersonalityMap, e cila mundëson eksplorimin e më shumë se 1 milion korrelacionesh mes personalitetit, besimeve dhe modeleve të sjelljes të individëve që morën pjesë në studime të mëparshme.
Ata trajnuan një rrjet nervor artificial për të parashikuar këto lidhje dhe e krahasuan me parashikimet e bëra nga AI të tjera si GPT-4o dhe Claude 3 Opus, si dhe nga 254 njerëz jo ekspertë dhe 272 ekspertë në psikologji. Rezultatet treguan se të gjitha modelet AI ishin më të sakta në parashikimin e këtyre korrelacioneve sesa shumica e njerëzve të zakonshëm dhe ekspertëve në psikologji. Veçanërisht, rrjeti neural i specializuar i zhvilluar nga ekipi i studiuesve kishte performancë më të mirë se modelet e tjera të përdorura gjerësisht.
Kjo gjetje tregon potencialin e modeleve AI për të parashikuar lidhje dhe për të identifikuar hipoteza premtuese në kërkimin shkencor, duke i mundësuar studiuesve të planifikojnë eksperimentet e tyre përpara se t’i kryejnë ato. Në të ardhmen, kërkuesit synojnë të zgjerojnë këto modele për të trajtuar dinamikat jo-lineare dhe analizat më të thella shkakësore./GazetaShneta/