Që nga fillimi i muajit mars janë raportuar raste të shumta të zjarreve në Kosovë, si ato fushore apo pyjore. Madje situata me zjarret në vend është bërë shqetësim edhe për institucionet e sigurisë, të cilat po punojnë ngushtë për ta parandaluar përhapjen e zjarreve dhe për të minimizuar dëmet.
Zjarreve në fusha dhe pyje nuk i ka shpëtuar as rajoni i Prishtinës. Për shuarjen e tyre në frontin e parë janë vënë zjarrfikësit duke intervenuar në qindra raste të ndryshme të zjarreve. E rastet e zjarreve janë bërë të shpeshta në gjithë territorin e Kosovës. Vetëm në kryeqytet gjatë javës që lamë pas janë shkaktuar 36 zjarre.
“Vetëm gjatë vikendit kemi pasur 36 raste të zjarreve fushore dhe malore të cilat e kanë rreziku pronën dhe të mirat materiale në hapësirën kur kanë ndodhur rastet. Gjatë intervenimeve një person nga Prapashtica ka humbur jetën si pasojë e zjarrit që është ndezur nga vet ai, dhe të gjitha ekipet kanë qenë të angazhuara dhe jemi në monitorim të situatës”, tha për RTK, Lulzim Fushtica, drejtor për Siguri dhe Emergjenca në Prishtinë.
Eksperti i emergjencave, Tahir Ahmeti, thotë se vënia e qëllimshme e zjarreve përbën vepër penale.
“Këto zjarre në ditët e fundit kanë qenë shqetësuese pasi kanë shkaktuar dëme të mëdha si në pyje, fusha apo në vendet ku ka paraqitur rrezik për pronat e qytetarëve dhe vet jetën e qytetarëve. Qytetarët të kenë kujdes dhe institucionet përveç fushatave, duhet të jenë më aktive në terren duke filluar nga rojet e pyjeve, policia, prokuroria që qytetarët e papërgjegjshëm të ndiqen penalisht sepse inicimi i qëllimshëm e zjarrit është vepër penale”, tha ai.
Sipas Policisë nga rajoni i Prishtinës, në disa nga këto incidente u atribuohen kushteve klimatike dhe se janë identifikuar edhe disa persona në rastet ku ata dyshohet se janë implikuar në rastet e zjarreve.
Për situatën e zjarreve në vend, drejtori ekzekutiv i Agjencisë së Menaxhimit Emergjent të Ministrisë së Punëve të Brendshme, Genc Metaj, gjatë një konferencë për media ka thënë se vetëm nga e premtja deri të hënën janë raportuar 294 raste të zjarreve në Kosovë. Dyshimet, sipas tij, tregojnë që shumica nga to janë të shkaktuara nga faktori njeri.