Çrregullimi i deficitit të vëmendjes dhe hiperaktivitetit (ADHD) diagnostikohet më së shumti në fëmijëri, por rastet e diagnostikimit te të rriturit janë në rritje.
ADHD tek të rriturit është i lidhur me një rrezik më të lartë për zhvillimin e demencës, por ekspertët ende nuk e dinë arsyen e saktë, shkruan burimi Medical News Today përcjell Gazeta Shneta.
Një studim i ri ka zbuluar se personat me ADHD në moshë të rritur kanë nivele të shtuara të hekurit në disa rajone të trurit dhe nivele të larta të treguesve biologjikë të dëmtimit nervor, të dyja këto të ngjashme me ato që shihen në demencë.
Kërkimet sugjerojnë se të rriturit me ADHD kanë një rrezik më të lartë për të zhvilluar demencë, por mekanizmat pas këtij rreziku mbeten të paqarta. Tani, një studim i ri e mbështet këtë lidhje dhe sugjeron mekanizmat neurologjikë që mund të jenë të përfshirë.
Profesor Paul G. Unschuld, drejtues i Divizionit të Psikiatrisë Geriatrike në HUG (Spitalet Universitare të Gjenevës), profesor i asociuar në Departamentin e Psikiatrisë në Fakultetin e Mjekësisë të Universitetit të Gjenevës tha se:
“Studimet epidemiologjike të fundit tregojnë se të rriturit që vuajnë nga ADHD kanë një rrezik të shtuar për demencë në moshë të avancuar, por mekanizmi përmes të cilit ADHD paraqet një rrezik ende nuk është i njohur.”
Studimi i tyre, i botuar në revistën “Psychiatry and Clinical Neurosciences”, zbuloi se të rriturit me ADHD kanë nivele të larta të hekurit në rajone të trurit që lidhen me funksionet njohëse. Gjithashtu, ata identifikuan biomarkerë të dëmtimit nervor në gjak, të ngjashëm me ata të vërejtur te personat me demencë.
“Sfidat kryesore të këtij studimi janë madhësia e vogël e mostrës (32 pacientë me ADHD), prandaj rezultatet duhet të interpretohen me kujdes. Nevojiten kërkime afatgjata për të konfirmuar nëse akumulimi i hekurit në tru dhe dëmtimi i aksoneve rrisin drejtpërdrejt rrezikun e demencës, apo nëse faktorë të tjerë si stili i jetesës, medikamentet dhe gjenetika luajnë një rol në këto modele të vëzhguara, tha Dr. Steve Allder, neurolog konsulent në ‘Re: Cognition Health’, i cili nuk ishte i përfshirë në studim. /Gazeta Shneta/