ShSKUK dhe organizata Care for Kosovo Kids kanë nënshkruar dy marrëveshje bashkëpunimi për të përmirësuar infrastrukturën dhe trajtimin e pacientëve në repartet pediatrike të QKUK-së.
Shërbimi Spitalor dhe Klinik Universitar i Kosovës (ShSKUK), përfaqësuar nga drejtori i përgjithshëm, Elvir Azizi, dhe organizata humanitare Care for Kosovo Kids (CfKK), përfaqësuar nga znj. Anke Gerrits, kanë nënshkruar sot, dy Memorandume Mirëkuptimi, që synojnë përmirësimin e infrastrukturës dhe cilësisë së trajtimit për pacientët në repartet pediatrike të QKUK-së.
Marrëveshja e parë ka të bëjë me zbatimin e sistemit-platformës moderne për regjistrimin dhe menaxhimin e të dhënave të pacientëve në repartin e Hemato-Onkologjisë pediatrike.
CfKK kontribuon me pajisje teknologjike dhe trajnime, kurse ShSKUK merr përsipër instalimin, mirëmbajtjen dhe sigurinë e sistemit në përputhje me ligjet për mbrojtjen e të dhënave.
Marrëveshja e dytë ka në fokus rinovimin e kuzhinës në Klinikën e Pediatrisë, si dhe sigurimin e pajisjeve për përmirësimin e shërbimeve për pacientët dhe stafin.
Kjo marrëveshje përfshin, investim nga CfKK në vlerë prej 50,000 euro për pajisje moderne të kuzhinës, kurse ShSKUK-së do të bëjë rinovimin e hapësirës dhe përfundimin e projektit sipas afateve të përcaktuara kohore.