Në repartin e Kujdesit Intensiv të Klinikës së Pediatrisë në Qendrën Klinike Universitare të Kosovës, gjatë tre muajve të parë të vitit 2025 janë trajtuar rreth 150 raste.
Sipas Dr. Petrit Xhakës, shef i këtij reparti, rastet më të shpeshta që kërkojnë trajtim intensiv janë ato të fëmijëve me infeksione të rënda respiratore, shkruan Gazeta Shneta.
“Dominuan fëmijët me probleme respiratore, sidomos ata që kanë pneumoni të rënda. Gjithashtu, trajtojmë fëmijë me anomalitë kardiake të cilat shpesh shoqërohen me komplikime të tjera, si dhe raste të fëmijëve me probleme neurologjike, tumore, infeksione që rrezikojnë jetën, insuficiencë akute renale, çrregullime endokrinologjike dhe çrregullime të rënda të elektroliteve,” tha Dr. Gjaka.
Ai shprehet se falë përmirësimeve të fundit në infrastrukturë dhe pajisjeve, sot në këtë repart ofrohet një gamë e plotë ekzaminimesh.
“Ekzaminimet klinike, laboratorike dhe imazherike janë bërë pjesë e pandashme e diagnostikimit”, thekson Dr. Gjaka.
Tutje, ai thekson se trajtimi është i ndryshëm për çdo fëmijë, duke u bazuar në patologjinë që ata kanë.
“Varësisht nga patologjia, fëmijët marrin trajtimin adekuat. Tek ata me infeksione respiratore, shpesh përdorim metoda jo invazive si terapia me fluks të lartë oksigjeni (Hi-Flow), e deri te ventilimi mekanik në rastet më të rënda,” shpjegon ai.
Për më shumë, ndiqni videon më poshtë: