Përbërësi kryesor në barnat më të përfolura për humbje peshe mund të ndihmojë në menaxhimin e një sëmundjeje serioze të mëlçisë përpara se të bëhet kërcënuese për jetën, sipas një prove të re klinike.
Rezultatet, të publikuara të mërkurën në revistën “New England Journal of Medicine”, ofrojnë prova të reja se barnat për humbje peshe mund të ndihmojnë në një sërë problemesh shëndetësore përtej diabetit të tipit 2 dhe obezitetit, për të cilat aktualisht janë të miratuara në BE, raporton Euronews Health përcjell Gazeta Shneta.
Semaglutidi, barnë që bën pjesë në grupin e agonistëve të receptorit GLP-1, funksionon duke shtypur oreksin. Por kërkimet sugjerojnë se ky grup barnash mund të ndihmojë gjithashtu edhe në çështje të tjera, nga varësitë deri te mpiksja e gjakut dhe demenca.
Tani, studimi i ri tregon se semaglutidi mund të jetë një trajtim i vlefshëm për pacientët me steatohepatit të lidhur me disfunksionin metabolik (MASH), një gjendje kur grumbullimi i yndyrës në mëlçi shkakton inflamacion dhe ind fibrotik (dhëmbëza).
Nëse nuk trajtohet, MASH mund të përparojë në cirrozë – një dëm i avancuar dhe i pakthyeshëm i mëlçisë. Kjo gjendje nuk lidhet me konsumimin e alkoolit, por është e lidhur me obezitetin, diabetin e tipit 2 dhe tensionin e lartë të gjakut.
Rezultate “jashtëzakonisht emocionuese”
Prova klinike e fazës së avancuar u financua nga kompania farmaceutike Novo Nordisk, e cila shet (ofron) semaglutidin me emrat tregtarë Ozempic dhe Wegovy. Ajo përfshiu 800 pacientë me MASH dhe fibrozë të moderuar ose të avancuar të mëlçisë.
Pas 72 javësh, 33% e pacientëve që morën semaglutid një herë në javë panë përmirësime si në inflamacion ashtu edhe në dhëmbëzimin e mëlçisë, krahasuar me 16% të atyre që morën placebo.
Duke i analizuar veçmas, rreth 63% e pacientëve që morën semaglutid patën ulje të inflamacionit, dhe 37% patën përmirësim të dhëmbëzimit. Në grupin placebo, këto shifra ishin përkatësisht 34% dhe 22%.
Pacientët që morën semaglutid humbën gjithashtu mesatarisht 10.5% të peshës së trupit.
Rezultatet e studimit janë “jashtëzakonisht emocionuese”, tha Dr. Debbie Shawcross, profesoreshë e hepatologjisë në King’s College London.
Megjithatë, Shawcross theksoi se nuk është vetëm semaglutidi që ka ndikim, pasi të dy grupet — si ai me barna, ashtu edhe ai me placebo — morën edhe këshillim për stilin e jetës dhe udhëzime për menaxhimin e problemeve të tjera shëndetësore.
Rreth gjysma e pjesëmarrësve kishin diabet të tipit 2, dhe rreth 75% ishin obezë. /Gazeta Shneta/