Stresi kronik ndikon në zakonet tona të të ngrënit, duke rritur rrezikun për shtim në peshë dhe obezitet.
Sipas një analize të Health News, shtetet amerikane me nivele të larta stresi, si Virxhinia Perëndimore, kanë gjithashtu norma më të larta të obezitetit. Në të kundërt, shtetet më të relaksuara si Hawaii kanë nivele më të ulëta.
Mbi 40% e të rriturve në SHBA janë obezë, ndërsa problemet e shëndetit mendor janë në rritje. Stresi ndikon në sjellje dhe në trup: dobëson vetëkontrollin, rrit dëshirën për ushqime të pashëndetshme dhe ndikon në hormonet si kortizoli, grelina dhe insulina. Këto mund të stimulojnë urinë dhe ruajtjen e yndyrës, transmeton Gazeta Shneta.
Studime të ndryshme tregojnë se stresi mund të ndryshojë edhe aktivitetin në zona të trurit që kontrollojnë oreksin dhe vetëpërmbajtjen.
Një studim i vitit 2015 zbuloi se dëshirat për ushqim të shkaktuara nga stresi ndikojnë drejtpërdrejt në rritjen e masës trupore.
Për të menaxhuar ngrënien nga stresi, ekspertët këshillojnë të identifikoni shkaktarët emocionalë, të praktikoni ndaljen para veprimit, dhe të kërkoni ndihmë profesionale nëse është e nevojshme.
Ndërsa ushqyerja e shëndetshme është e rëndësishme, obeziteti lidhet edhe me faktorë si gjenetika, sëmundjet, medikamentet, si dhe faktorët socio-ekonomikë. Megjithatë, kontrolli i stresit mund të ndihmojë jo vetëm në peshë, por edhe në parandalimin e sëmundjeve serioze si kanceri dhe sëmundjet e zemrës. /Gazeta Shneta/