Ekspertët thonë se nevojiten më shumë kërkime për të përcaktuar nëse ushqimet ultra të përpunuara rrisin drejtpërdrejt rrezikun e vdekjes së parakohshme, apo nëse ato janë thjesht një “faktor dytësor” të cilit i atribuohen faktorë të tjerë.
Njerëzit që konsumojnë më shumë ushqime ultra të përpunuara janë në rrezik më të madh për të vdekur para kohe, siç sugjeron një studim i ri shkencor.
Ushqimet ultra të përpunuara, të tilla si patate të skuqura, makarona, drithërat me sheqer për mëngjes dhe salçiçet, shpesh përmbajnë ngjyra dhe aroma artificiale e janë të larta në sheqer, yndyrë të ngopur dhe kripë.
Studimi i ri, i botuar në “American Journal of Preventive Medicine”, tregon se për çdo rritje prej 10% të përqindjes së dietave të përbëra nga ushqime ultra të përpunuara, kishte një rritje prej 2.7% të rrezikut të vdekjes së parakohshme.
Analiza përfshinte njerëz të moshës 30 deri në 69 vjeç dhe u shtri tetë vende, mes tyre Kolumbia e Brazili, që kanë nivele relativisht të ulëta të konsumit të ushqimit ultra të përpunuar. Po ashtu në Kili e Meksikën, ku konsumi është “i ndërmjetëm”, si dhe në Australi, Kanada, Mbretërinë e Bashkuar e në Shtetet e Bashkuara të Amerikë, ku shumë njerëz konsumojnë shumë ushqime ultra të përpunuara.
Eshtë shqetësuese që ndërsa konsumi i ushqimeve ultra të përpunuara në vendet me të ardhura të larta ka qenë i lartë, por relativisht i qëndrueshëm për më shumë se një dekadë, konsumi në vendet me të ardhura të ulëta dhe të mesme është rritur vazhdimisht, vuri në dukje në një deklaratë Eduardo Augusto Fernandes Nilson, autori kryesor i studimit dhe studiues në Fondacionin Oswaldo Cruz në Brazil.
Studiues të pavarur paralajmëruan se rezultatet nuk sugjerojnë që ushqimet ultra të përpunuara rrisin drejtpërdrejt rrezikun e vdekjes së parakohshme, megjithëse ata thanë se këto ushqime meritojnë shqyrtim të mëtejshëm.