Ilaçet e fundit për humbje peshe si Ozempic/Wegovy mund ta ulin ndjeshëm konsumin e alkoolit në një kohë të shkurtër, thotë një studim i ri.
Njerëzit që merrnin semaglutide ose liraglutide e ulën konsumin e alkoolit me dy të tretat brenda katër muajve, sipas rezultateve të botuara së fundmi.
Këto ilaçe të peptidit-1 të ngjashëm me glukagonin (GLP-1) imitojnë hormonin GLP-1, i cili ndihmon në kontrollin e niveleve të insulinës dhe sheqerit në gjak, ul oreksin dhe ngadalëson tretjen e ushqimit.
Ilaçet GLP-1 arrijnë disa nga këto efekte duke ndikuar drejtpërdrejt në dëshirat e trurit për ushqim, dhe kjo mund të shtrihet edhe në dëshirat për alkool, tha studiuesi i lartë Dr. Carel le Roux, kryetar i patologjisë eksperimentale në University College Dublin në Irlandë, shkruan Healthyday, transmeton Gazeta Shneta.
“Kështu, pacientët raportojnë se efektet janë ‘pa mundim”, duke i lejuar ata të ndërpresin pirjen e alkoolit me pak përpjekje të vetëdijshme, tha Le Roux.
Pirja e alkoolit përbën gati 5% të vdekjeve në mbarë botën, vunë në dukje studiuesit. Trajtimet për problemet me pirjen e alkoolit mund të jenë shumë të suksesshme në afat të shkurtër, por rreth 70% e pacientëve rikthehen brenda një viti.
Studimet e hershme në kafshë kanë treguar se ilaçet GLP-1 mund të ndihmojnë në uljen e dëshirës për alkool, por studimet që përfshijnë njerëzit sapo kanë filluar të dalin në pah, thanë studiuesit.
Për këtë studim, studiuesit monitoruan shëndetin e 262 personave që ishin klinikisht mbipeshë ose obezë dhe që po trajtoheshin për peshë të tepërt në një klinikë në Dublin. Të gjithë pacientëve u ishte përshkruar ose semaglutide ose liraglutide për humbje peshe.
Rreth 12% nuk pinë kurrë; 20% pinë rrallë; dhe 68% pinë rregullisht, thanë studiuesit.
Rezultatet tregojnë se midis atyre që pinë rregullisht alkool, konsumi i alkoolit u ul me 68% brenda katër muajve nga fillimi i barnave GLP-1. Studiuesit thanë se kjo është e krahasueshme me rezultatet e nalmefenit, një ilaç i përdorur për të trajtuar alkoolizmin në Evropë.
“Analogët e GLP-1 kanë treguar se trajtojnë obezitetin dhe zvogëlojnë rrezikun e ndërlikimeve të shumta që lidhen me të”, tha Le Roux. “Tani, efektet e dobishme përtej obezitetit, siç është konsumi i alkoolit, po studiohen në mënyrë aktive, me disa rezultate premtuese”.
Megjithatë, studiuesit vunë re se studimi përfshinte një numër të vogël pacientësh dhe nuk i krahasoi ata me një grup kontrolli që nuk merrte ilaçe GLP-1./Gazeta Shneta.