Një grup studiuesish nga Charité – Universitätsmedizin Berlin ka zhvilluar një model të ri me inteligjencë artificiale (IA), të quajtur crossNN, që është në gjendje të identifikojë me saktësi të lartë më shumë se 170 lloje të ndryshme kanceri, përfshirë edhe tumoret e trurit, pa pasur nevojë për biopsi invazive.
Modeli përdor një “gjurmë gishti epigjenetike” të tumoreve, duke analizuar ndryshimet në materialin gjenetik përmes likuidit cerebrospinal apo mostrave të ADN-së. Në vend që të bazohet në mikroskopi tradicionale, modeli sheh brenda gjeneve të tumorit dhe identifikon tiparet që e dallojnë atë nga llojet e tjera.
Në studimin e publikuar në revistën Nature Cancer, crossNN demonstroi një saktësi prej 99.1% në diagnostikimin e tumoreve të trurit dhe 97.8% për tumoret nga të gjitha organet, duke e bërë atë më të saktë se modelet e mëparshme të IA.
Për raste të ndjeshme – si pacientët me tumor në zona të rrezikshme të trurit ku biopsia është me rrezik të lartë – përdorimi i kësaj teknologjie sjell shpresë për diagnostikim jo-invaziv dhe të shpejtë.
Një rast konkret përfshin një pacient me shikim të dyfishtë, të cilit përmes analizës së likuidit cerebrospinal iu diagnostikua limfoma e sistemit nervor qendror dhe trajtimi u nis menjëherë.
Studiuesit e konsiderojnë këtë teknologji si një hap të madh drejt mjekësisë së personalizuar të kancerit, pasi ajo ofron diagnozë të saktë, të shpejtë dhe të kuptueshme, dhe po planifikojnë ta testojnë në klinika në të gjithë Gjermaninë.
Synimi është që kjo metodë e re, efikase dhe jo e kushtueshme, të integrohet në kujdesin rutinor mjekësor./Gazeta Shneta/