Fushata e vaksinimit kundër virusit HPV, e cila ka filluar vitin e kaluar me vajzat e klasave të gjashta, tashmë është zgjeruar edhe për djemtë.
Deri më tani, 78% e fëmijëve të klasave të gjashta – vajza dhe djem, janë të vaksinuar por autoritetet shëndetësore synojnë që kjo përqindje të arrijë në 90% deri në fund të vitit.
Në një intervistë për Gazetën Shneta, Dr. Fetije Fetaj, drejtoreshë e Programit të Imunizimit në Institutin Kombëtar të Shëndetësisë Publike të Kosovës (IKSHPK), tregoi se fushata ka filluar me sukses vitin e kaluar dhe po zgjerohet me planifikim dhe bashkëpunim me Ministrinë e Shëndetësisë.
“Me vaksinën e HPV kemi filluar vitin e kaluar, fillimisht me vajzat. Mbulueshmëria ishte mjaft e mirë. 85% e vajzave të kësaj moshe janë vaksinuar. Këtë vit, në bashkëpunim me MSh, kemi planifikuar dhe siguruar vaksina edhe për djemtë. Vaksinimi ka nisur në shkurt nëpër shkolla dhe do të vazhdojë edhe gjatë muajve të verës për fëmijët që nuk kanë mundur ta marrin më herët,” tha Dr. Fetaj.
Edhe pse mbulueshmëria është e lartë, Dr. Fetaj thotë se ka pasur raste kur disa prindër kanë hezituar ta vaksinojnë fëmijën e tyre për shkak të pasigurisë apo mungesës së informacionit.
“Është e vërtetë që disa prindër kanë shfaqur hezitim, gjë që e konsiderojmë normale. Për këtë arsye, ekipet shëndetësore parësore dhe IKSHPK kanë komunikuar drejtpërdrejt me prindërit. Kemi pasur raste konkrete në një shkollë ku një numër i madh prindërish kanë kërkuar sqarime shtesë – dhe ne kemi intervenuar menjëherë me ekipe të epidemiologëve dhe profesionistëve që kanë ofruar të gjitha informacionet e nevojshme,” tha ajo.
Dr. Fetaj shton se synimi është që vaksinimi të bëhet në mënyrë të plotë përmes institucioneve shkollore, ndërsa gjatë pushimeve verore, ata që nuk kanë mundur të vaksinohen në shkollë mund të shkojnë në institucionet shëndetësore bashkë me prindërit./Gazeta Shneta/
Për më shumë ndiqni intervistën: