Meqë njerëzit po jetojnë më gjatë, ka një theks gjithnjë e më të madh mbi plakjen e shëndetshme. Dieta ushqyese është një nga faktorët që mund të ndikojë në plakjen më të shëndetshme.
Një studim i ri ka zbuluar se konsumimi i ushqimeve dhe pijeve të pasura me flavonoide mund të ndihmojë në uljen e rrezikut për disa aspekte të plakjes jo të shëndetshme, siç janë dobësimi trupor dhe shëndeti i dobët mendor, shkruan burimi Medical News Today transmeton Gazeta Shneta.
Sipas Organizatës Botërore të Shëndetësisë (OBSH), numri i njerëzve mbi moshën 60 vjeç në të gjithë botën pritet të rritet nga 1 miliard në vitin 2020, në 1.4 miliardë në vitin 2030 dhe në 2.1 miliardë deri në vitin 2050. Gjithashtu, numri i personave që kalojnë moshën 100 vjeç pritet të arrijë në afro 4 milionë deri në vitin 2054.
“Meqë njerëzit jetojnë më gjatë, ne duam të sigurohemi që ata të qëndrojnë të shëndetshëm dhe të pavarur për sa më gjatë që të jetë e mundur,” tha për MNT, Nicola Bondonno, PhD, hulumtuese postdoktorale në Institutin Danez të Kancerit në Kopenhagë, Danimarkë.
“Gjetja e mënyrave të natyrshme dhe të përditshme për të mbështetur plakjen e shëndetshme, siç është përmes dietës, ofron një qasje me kosto të ulët dhe të qasshme që mund të ketë ndikim të madh në cilësinë e jetës dhe të ulë presionin mbi sistemet shëndetësore.”
Bondonno është autorja e parë e një studimi të ri të publikuar së fundmi në “The American Journal of Clinical Nutrition”, ku u zbulua se konsumimi i ushqimeve dhe pijeve të pasura me flavonoide – një lloj përbërjeje fito-kimike – mund të ndihmojë në uljen e rrezikut nga disa aspekte të plakjes jo të shëndetshme, siç janë dobësimi fizik dhe shëndeti i dobët mendor.
Flavonoidet gjenden në një shumëllojshmëri frutash, perimesh dhe ushqimesh me bazë bimore, si:
– Fruta malore si boronicat dhe mjedrat.
– Agrumet si portokalli dhe qitroja.
– Çokollata e zezë.
– Fruta të tjera si pjeshkët dhe bananet.
– Çaji jeshil dhe i zi.
– Perime me gjethe jeshile si lakra kale dhe spinaqi.
– Vera e kuqe.
– Perime të tjera si bizellet, qepët dhe domatet. /Gazeta Shneta/