Administrata Trump është përballur me reagime të ashpra nga komuniteti shkencor pas një propozimi të Agjencisë Amerikane për Mbrojtjen e Mjedisit (EPA), e cila pretendoi se emetimet e karbonit nga termocentralet me lëndë djegëse fosile “nuk kontribuojnë ndjeshëm në ndotjen e rrezikshme të ajrit”. Ky propozim parashikon zbutjen e kufizimeve për gazrat serrë dhe ndotësit e tjerë industrialë.
Megjithatë, 19 shkencëtarë të fushave të ndryshme si klimatike, shëndetësisw dhe ekonomisw, i thanë agjencisë Associated Press se ky pretendim është shkencërisht i pavërtetë. Shumë prej tyre e quajtën deklaratën si dezinformatë të rrezikshme, raporton Euronews Health transmeton Gazeta Shneta.
“Është kimi elementare”
Zeke Hausfather, shkencëtar i fushws klimatike pranë kompanisë teknologjike Stripe dhe grupit monitorues Berkeley Earth, tha: “Kjo është e barasvlershme me të thënë se duhani nuk shkakton kancer në mushkëri. Përfundimi i administratës është plotësisht absurd.”
Philip Mote, shkencëtar në Universitetin Shtetëror të Oregonit, shtoi se: “Është kimi elementare që djegia e qymyrit dhe gazit natyror liron dioksid karboni, dhe është fizikë e thjeshtë që CO2 ngroh planetin. I kemi ditur këto fakte që nga mesi i shekullit të 19-të.”
Dr. Howard Frumkin, ish-drejtor i Qendrës Kombëtare për Shëndetin Mjedisor në SHBA dhe profesor i pensionuar i shëndetit publik, deklaroi se “termocentralet me qymyr dhe gaz kontribuojnë ndjeshëm në ndryshimet klimatike”, të cilat “rrisin rrezikun nga vala e të nxehtit, stuhitë katastrofike, sëmundjet infektive dhe kërcënime të tjera serioze për shëndetin”.
“Janë fakte të pakundërshtueshme,” theksoi ai.
Kathy Jacobs, shkencëtare në Universitetin e Arizonës, u shpreh: “Deklarata e EPA-së bie ndesh me dëshmitë shkencore të paraqitura nga mijëra shkencëtarë në gati 200 vende përgjatë dekadave.”
Ndërsa Chris Field, shkencëtar në Universitetin Stanford dhe koordinator i një raporti ndërkombëtar mbi lidhjen mes ndryshimeve klimatike dhe ekstremeve të motit, e përmblodhi situatën kështu: “Është e vështirë të imagjinohet një vendim më i pamend se vendosja e interesave afatshkurtra të industrisë së naftës dhe gazit përpara interesave afatgjata të fëmijëve dhe nipërve tanë”. /Gazeta Shneta/