Sa më të larta të jenë temperaturat e jashtme, aq më të mëdha janë efektet negative në trupin e njeriut, paralajmëron Dr. Vjollca Zeqiri, specialiste e mjekësisë familjare në QKMF në Prishtinë.
Sipas Dr. Zeqirit, trupi ynë ka mekanizma termorregullues për të kontrolluar temperaturën, por nxehtësia e lartë i prish këto mekanizma, duke sjellë probleme të shumta shëndetësore, shkruan Gazeta Shneta.
“Ekspozimi i zgjatur ndaj nxehtësisë krijon stres fiziologjik në organizëm, që përkeqëson sëmundjet ekzistuese si ato të frymëmarrjes, diabetin, problemet kardiovaskulare dhe veshkat,” shpjegon ajo.
Sipas saj një nga efektet kryesore të temperaturave të larta është dehidrimi.
“Djersitja e shtuar bën që të humbasim shumë elektrolite, çka sjell tharje të gojës, etje të madhe, tharje të mukozave dhe urinim të rrallë me ngjyrë të errët,” thotë Dr. Zeqiri.
Sipas saj, ka dhe simptoma të tjera të cilat nëse nuk marrin trajtim mund të vijë puna deri te koma.
“Ndër simptomat e tjera janë ngërçet muskulore dhe lodhja, të cilat në raste të rënda mund të çojnë deri te dëmtimi i fibrave muskulare, sidomos tek ata që bëjnë punë fizike. Nëse këto simptoma nuk trajtohen, mund të vijë deri te goditja nga nxehtësia, një emergjencë që shkakton konfuzion, humbje të vetëdijes dhe koma,” u shpreh Dr. Zeqiri
Për t’u mbrojtur nga nxehtësia, ajo rekomandon:
– Pirjen e 8 gotave ujë në ditë, dhe mbi 2 litra për ata që ushtrojnë;
– Konsumimin e ushqimeve të lehta, si pemë, perime dhe supa, duke shmangur yndyrnat, kripën dhe sheqerin;
– Veshjen e rrobave të gjera, të lehta, me ngjyrë të bardhë dhe prej pambuku ose liri;
– Përdorimin e syzeve dhe kapelës për mbrojtje nga dielli;
– Mbajtjen e barnave kronike në temperatura të freskëta dhe marrjen e tyre rregullisht;
– Freskimin e ambienteve të mbyllura duke hapur dritaret në mëngjes dhe mbrëmje;
– Përdorimin e kondicionerit me temperaturë deri në 28 °C gjatë ditës dhe 24 °C natën.
“Këto masa janë të nevojshme për të shmangur efektet e rënda të nxehtësisë dhe për të ruajtur shëndetin gjatë verës,” përfundon Dr. Zeqiri./Gazeta Shneta/
Për më shumë ndiqni videon më poshtë: