Rreth 15.7 milionë fëmijë në mbarë botën nuk kanë marrë asnjë vaksinë rutinë deri në vitin 2023, sipas një studimi të ri global të publikuar në “The Lancet”.
Sipas një raporti të ri global të publikuar në revistën “The Lancet”, rreth 15.7 milionë fëmijë në mbarë botën kanë mbetur plotësisht të pavaksinuar deri në vitin 2023.
Pavarësisht se vaksinimet kundër sëmundjeve si fruthi, poliomieliti dhe tuberkulozi kanë shpëtuar mbi 150 milionë jetë në 50 vitet e fundit, tendenca e mbulimit po bie – si në vendet e varfra, ashtu edhe ato të pasura, raporton Euronews Health transmeton Gazeta Shneta.
Rënia ka nisur me ndërprerjet në shëndetësi gjatë pandemisë COVID-19 dhe është thelluar nga përhapja e dezinformimit për vaksinat.
Ndërmjet viteve 2020–2023, miliona fëmijë humbën dozat e vaksinave bazike. Mbi 15 milionë nuk morën dozën kundër fruthit apo tre dozat e vaksinës DTP (difteria-tetano-pertusis), 15.9 milionë mbetën pa vaksinën e poliomielitit dhe mbi 9 milionë pa vaksinën kundër tuberkulozit. Edhe pse numri i fëmijëve pa asnjë vaksinë (“zero-dose children”) ka rënë nga kulmi në vitin 1980, ai mbetet më i lartë sesa para pandemisë.
Shumica e këtyre fëmijëve ndodhen në Afrikën nën-Sahariane dhe në Azinë Jugore, por mbi 165,000 jetojnë në Bashkimin Evropian dhe Mbretërinë e Bashkuar.
Që nga viti 2010, mbulimi me vaksina ka rënë të paktën për një vaksinë në 21 vende të pasura, përfshirë Gjermaninë, Francën, Italinë dhe Suedinë.
Ekspertët kërkojnë investime të reja në fushatat e vaksinimit, luftimin e hezitimit ndaj vaksinave dhe rikthimin e besimit tek institucionet shëndetësore. Siç tha pediatri David Elliman: “Askush nuk është i sigurt, derisa të gjithë të jenë të sigurt”. /Gazeta Shneta/