Një grup ekspertësh i Organizatës Botërore të Shëndetësisë (OBSH) nuk arriti të gjejë një përgjigje përfundimtare lidhur me origjinën e pandemisë së COVID-19, sipas raportit të tyre përfundimtar.
Shkencëtarët ende nuk janë të sigurt se si filloi pandemia e COVID-19 – emergjenca më e rëndë shëndetësore e shekullit të fundit.
Ky ishte përfundimi zhgënjyes i një grupi të mandatuar nga OBSH për të hetuar origjinën e pandemisë. Kryetarja e grupit, Marietjie Venter, deklaroi në një konferencë për media se shumica e të dhënave shkencore mbështesin hipotezën se koronavirusi i ri kaloi te njerëzit nga kafshët, raporton Euronews Health transmeton Gazeta Shneta.
Mes tjerash, ky ishte gjithashtu përfundimi i grupit të parë të ekspertëve të OBSH-së që hetoi origjinën e pandemisë në vitin 2021, kur shkencëtarët arritën në përfundimin se virusi ka të ngjarë të jetë përhapur nga lakuriqët e natës te njerëzit, përmes një kafshe ndërmjetëse.
Në atë kohë, OBSH deklaroi se një rrjedhje laboratorike ishte “jashtëzakonisht e pamundur”. Venter tha se, pas më shumë se tre vitesh punë, grupi i ekspertëve nuk arriti të sigurojë të dhënat e nevojshme për të vlerësuar nëse COVID-19 mund të ketë qenë rezultat i një aksidenti laboratorik, pavarësisht kërkesave të përsëritura për qindra sekuenca gjenetike dhe informacione më të detajuara mbi sigurinë biologjike që iu drejtuan qeverisë kineze.
“Prandaj, kjo hipotezë nuk mund të hetohej apo të përjashtohej,” tha ajo. “Ajo u konsiderua shumë spekulative, e mbështetur në opinione politike dhe jo në shkencë.”
Venter, sqaroi se grupi prej 27 anëtarësh nuk arriti në një konsensus; një anëtar dha dorëheqje këtë javë, ndërsa tre të tjerë kërkuan që emrat e tyre të hiqen nga raporti.
Drejtori i Përgjithshëm i OBSH-së, Tedros Adhanom Ghebreyesus, tha se është një “detyrim moral” të zbulohet se si filloi COVID-19, duke theksuar se virusi ka shkaktuar të paktën 20 milionë viktima, ka zhdukur më shumë se 10 trilionë dollarë nga ekonomia globale dhe ka përmbysur jetën e miliarda njerëzve.
Vitin e kaluar, agjencia Associated Press raportoi se qeveria kineze bllokoi përpjekjet e rëndësishme kombëtare dhe ndërkombëtare për të gjurmuar origjinën e virusit gjatë javëve të para të shpërthimit në vitin 2020 dhe se vetë OBSH-ja mund të ketë humbur mundësi të hershme për të hetuar se si filloi COVID-19.
Presidenti amerikan Donald Trump e ka fajësuar prej kohësh një aksident laboratorik në Kinë për shpërthimin e virusit, ndërsa një analizë e shërbimeve të inteligjencës amerikane arriti në përfundimin se nuk ka prova të mjaftueshme për ta mbështetur këtë teori.
Zyrtarët kinezë kanë mohuar vazhdimisht idenë se pandemia mund të ketë nisur në një laborator, duke thënë se kërkimi për origjinën e saj duhet të zhvillohet në vende të tjera. /Gazeta Shneta/