Një shpërthim helmimi me ushqim në veri të Francës, i lidhur me bakterin E. coli, ka prekur 25 persona – përfshirë 24 fëmijë dhe një të moshuar.
Sipas raportimit të Euronews Health, një vajzë 12-vjeçare ka ndërruar jetë, ndërsa 10 persona janë ende në spital. Nëntë raste kanë zhvilluar sindromën hemolitiko-uremike (HUS), e cila dëmton veshkat dhe qarkullimin e gjakut.
Autoritetet besojnë se burimi është mishi i kontaminuar i shitur nga gjashtë dyqane mishi në zonën Saint-Quentin, që tani janë mbyllur përkohësisht. Po ashtu, janë dhënë alarme publike për ngjarje ku është shitur ky mish, përfshirë një turne futbolli, festival basketbolli dhe panair shkolle, transmeton Gazeta Shneta.
Qytetarëve u është kërkuar të hedhin çdo ushqim të blerë nga këto dyqane pas 1 qershorit, të pastrojnë frigoriferët dhe të kërkojnë ndihmë mjekësore nëse shfaqin simptoma si diarre me gjak dhe mukus, dhimbje barku, temperaturë ose të vjella.
E. coli zakonisht shkakton shqetësime të lehta, por disa shtame prodhojnë toksina që mund të çojnë në sindromën hemolitiko-uremike, sidomos te fëmijët e vegjël. Në vitin 2023, në Francë u raportuan 143 raste me këtë sindromë, shumica te fëmijët nën 3 vjeç.
Për t’u mbrojtur: lani duart, gatuani mirë mishin, pastroni perimet dhe mbani të ndara ushqimet e papërpunuara nga ato të gatuara. Fëmijët nën 5 vjeç nuk duhet të pinë qumësht të papërpunuar apo ujë të patrajtuar. /Gazeta Shneta/