Presidentja e Kosovës, Vjosa Osmani, ka pritur në një takim përfaqësuesit e Shoqatës së të Drejtave të Pacientëve në Kosovë (PRAK), ku u diskutua për përfaqësimin ndërkombëtar të pacientëve dhe sfidat në sistemin shëndetësor.
Presidentja Osmani, ka mirëpritur në një takim përfaqësuesit e PRAK-ut, ku u diskutuan përpjekjet ndërkombëtare të shoqatës për fuqizimin e zërit të pacientëve dhe sfidat që po e shoqërojnë sistemin shëndetësor në Kosovë, transmeton Gazeta Shneta.
Ky takimi u hap nga Muhamedali Kodra nga Bordi i PRAK, i cili vlerësoi gatishmërinë e Presidentes për të dëgjuar zërin e pacientëve dhe theksoi rëndësinë e një dialogu të vazhdueshëm për çështjet shëndetësore.
Drejtori Ekzekutiv i PRAK, Agron Bytyqi, foli për dy arritje të rëndësishme të shoqatës: anëtarësimin në Forumin Evropian të Pacientëve (EPF) dhe përfshirjen në Bordin Drejtues të Aleancës Botërore të Shoqatave të Pacientëve (IAPO). Ai kërkoi mbështetjen institucionale të shtetit për të garantuar që perspektiva e pacientëve të jetë sa më e përfaqësuar në proceset vendimmarrëse ndërkombëtare.
Besim Kodra, Drejtor i Programeve në PRAK, theksoi nevojën për reforma të thella dhe të qëndrueshme në shëndetësi, ndërsa Nafije Latifi kërkoi themelimin e një Qendre Kombëtare për Kujdesin Paliativ për pacientët me sëmundje të avancuara që kërkojnë trajtim të vazhdueshëm dhe dinjitoz.
Presidentja Osmani vlerësoi angazhimin e PRAK dhe theksoi rëndësinë e mbrojtjes së të drejtave të pacientëve dhe ndërtimit të një sistemi shëndetësor të barabartë, transparent dhe me pacientin në qendër. /Gazeta Shneta/