Parlamenti grek ka miratuar një ligj të ri që synon të mbrojë fëmijët nga pirja e duhanit dhe alkoolit, duke vendosur rregulla të rrepta për verifikimin e moshës, ndalimin e reklamimit dhe kufizime për përdorimin e duhanit në ambiente publike.
Ligji parashikon gjoba deri në 10,000 euro dhe burgim deri në tre vjet për personat që shkelin rregullat – përfshirë shitjen e alkoolit apo duhanit te të miturit, përdorimin e fëmijëve për të shitur duhan, punësimin e tyre në bare apo lejimin e qëndrimit të tyre në këto vende, shkruan burimi Euronews Health transmeton Gazeta Shneta.
Tregtarët janë të detyruar të verifikojnë moshën e blerësve të cigareve, vapes apo produkteve të tjera të ngjashme. Nëse kanë ndonjë dyshim për identitetin apo moshën e blerësit, ata duhet të refuzojnë shitjen.
Ligji ndalon përdorimin e duhanit dhe shitjen e tij në internet cafe apo ambiente me lojëra elektronike.
Po ashtu, ndalohet pirja e duhanit në stadiume dhe vende të tjera sportive apo argëtuese ku qëndrojnë të miturit. Pirja e duhanit ndalohet edhe në taksi dhe transport publik, me gjoba që arrijnë deri në 3,000 euro dhe pezullim të patentës për një muaj.
Reklamimi dhe ekspozimi i produkteve të duhanit ndalohet në ambiente të hapura apo pranë institucioneve shëndetësore e arsimore. Produktet që imitojnë duhanin do të ndalohen gjithashtu. /Gazeta Shneta/