Zvicra ka miratuar trajtimin e parë në botë për malarien te të porsalindurit, duke hapur rrugën për përdorimin e tij në Afrikë, ku kjo sëmundje është e përhapur dhe vdekjeprurëse.
Miratimi nga rregullatori zviceran Swissmedic pritet të pasohet shpejt nga tetë vende afrikane – përfshirë Keninë, Nigerinë dhe Ugandën – në kuadër të një bashkëpunimi për përshpejtimin e miratimeve, raporton Euronews Health transmeton Gazeta Shneta.
Në vitin 2023, rreth 36 milionë shtatzëni u regjistruan në 33 vende afrikane të prekura nga malaria.
Rreth një në tre nëna ishin të infektuara gjatë shtatzënisë, duke rritur rrezikun që sëmundja të transmetohej te foshnjat e tyre. Sipas OBSH-së, çdo foshnjë në këto kushte është një potencial për infektim.
Bari i ri, i quajtur ‘Coartem Baby’, është versioni i përshtatur i një trajtimi ekzistues për fëmijët, por me dozë dhe përbërje të ndryshme për të shmangur efektet anësore te të porsalindurit që peshojnë më pak se pesë kilogramë. Ilaçi ka shije qershie dhe mund të tretet në qumësht gjiri për lehtësim në administrim.
Më parë, këta foshnja trajtoheshin me doza të pjesshme të barnave për fëmijë më të rritur, gjë që shtonte rrezikun për efekte anësore. Për më tepër, vaksinimi kundër malaries nuk fillon para moshës pesë muaj, duke i lënë foshnjat më të vogla të pambrojtura.
Ky zhvillim cilësohet si hap i madh për trajtimin e hershëm dhe të sigurt të malaries në moshat më të ndjeshme. /Gazeta Shneta/