Valët e të nxehtit në Europë po rrezikojnë seriozisht shëndetin e punëtorëve, nga fermat e Italisë te magazinat e Gjermanisë. Stresi nga nxehtësia mund të çojë në rraskapitje, goditje nga nxehtësia apo edhe vdekje. Po ashtu mund të përkeqësojë sëmundjet e zemrës, të frymëmarrjes dhe shëndetin mendor.
Për dallim nga ndotja e ajrit, BE-ja nuk ka rregulla të përbashkëta për ekspozimin në të nxehtë, duke ia lënë çdo shteti ligjet përkatëse, shkruan burimi Euronews Health transmeton Gazeta Shneta.
Sipas indeksit të temperaturës WBGT, që përfshin lagështinë, rrezatimin, erën dhe nxehtësinë, rreziqet për punëtorët rriten kur ajo kalon 29–32°C, sidomos për ata që punojnë në kushte fizike të rënda.
Punëtorët duhet të jenë të vëmendshëm ndaj shenjave si lodhje, marramendje, kokëdhimbje, të përziera, mpirje muskujsh apo konfuzion.
Nëse këto ndodhin, duhet të ndalen, të pinë ujë, të qëndrojnë në hije dhe të kërkojnë ndihmë nëse simptomat nuk largohen brenda 30 minutave.
Disa shtete si Franca, Italia dhe Spanja kanë vendosur rregulla për mbrojtjen e punëtorëve gjatë të nxehtit, përfshirë furnizimin me ujë dhe ndalimin e punëve jashtë në orët më të nxehta.
Në BE, punëtorët kanë të drejtë të refuzojnë punën nëse ndihen të rrezikuar, por zbatimi i këtyre të drejtave mbetet sfidë. /Gazeta Shneta/