Sipas një studimi të publikuar në “Clinical Neurophysiology”, çiklizmi mund të ndihmojë në rikthimin e lidhjeve nervore të dëmtuara nga sëmundja e Parkinsonit, një gjendje neurologjike që prek aftësinë për të lëvizur dhe prek mbi 10 milionë njerëz në mbarë botën.
Sipas burimit Medical News Today, Parkinsoni dëmton sistemin nervor qendror, duke sjellë ndërprerje të ndërlikuara në funksionin e trurit, të cilat përkeqësohen me kalimin e kohës.
Studimi, i udhëhequr nga Dr. Aasef Shaikh në Universitetin e Cleveland-it, përfshiu nëntë pjesëmarrës me Parkinson që kishin të implantuar pajisje stimulimi të thellë të trurit (DBS).
Ata ndoqën 12 seanca çiklizmi gjatë një periudhe prej katër javësh. Çiklizmi u zhvillua përmes një programi adaptiv, ku biçikleta “mësonte” performancën e secilit dhe rregullonte rezistencën në varësi të përpjekjes.
Pas përfundimit të seancave, u vërejtën ndryshime të matshme në sinjalet e trurit që lidhen me kontrollin motorik dhe lëvizjen. Kjo sipas Dr. Shaikh, provon se ushtrimet fizike ndryshojnë funksionin e trurit, por këto ndryshime kërkojnë vazhdimësi dhe këmbëngulje, transmeton Gazeta Shneta.
Ai theksoi se mekanizmi mund të ndodhet jashtë ganglieve bazale — strukturës kryesore të prekur nga Parkinsoni — ndoshta në sistemin propriocetiv ose në tru të vogël (cerebellum).
Mesazhi kryesor për pacientët është të ruajnë një stil jetese aktiv, duke kombinuar ushtrime fizike dhe mendore për të ngadalësuar përparimin e sëmundjes.
Studiuesit synojnë të zgjerojnë kërkimin me imazheri më të avancuar dhe prova në shkallë më të gjerë, si dhe të testojnë lloje të tjera aktivitetesh fizike për përfitime të ngjashme. /Gazeta Shneta/