Një studim i ri ka zbuluar përfitime afatgjata të medikamenteve për çrregullimin e deficitit të vëmendjes dhe hiperaktivitetit (ADHD), përtej efekteve anësore të njohura si pagjumësia, humbja e oreksit dhe irritimi.
Tek personat e sapo diagnostikuar me ADHD, përdorimi i ilaçeve lidhet me ulje të dukshme të rrezikut për sjellje vetëvrasëse, abuzim me alkool apo drogë, aksidente rrugore dhe aktivitete kriminale, shkruan Euronews Health transmeton Gazeta Shneta.
ADHD prek rreth 5% të fëmijëve dhe 2.5% të të rriturve, duke shkaktuar shpërqendrim, harresë, energji të lartë dhe shqetësim.
Studimi i publikuar në “BMJ”, analizoi gati 149,000 persona të moshës 6–64 vjeç në Suedi (2007–2020), duke krahasuar ata që nisën trajtimin brenda tre muajve nga diagnoza me ata që nuk morën ilaçe, për një periudhë mesatare ndjekjeje prej dy vitesh.
Rezultatet treguan: 17% ulje të rrezikut për vetëvrasje apo tentativa vetëvrasjeje, 15% reduktim të abuzimit me substanca, 12% më pak aksidente rrugore dhe 13% rënie të kriminalitetit.
Studiuesit sugjerojnë se kjo lidhet me uljen e impulsivitetit dhe përmirësimin e vëmendjes, duke ndikuar në sjellje më të kontrolluar dhe shmangie aksidentesh.
Megjithatë, ekzistojnë kufizime, si mundësia që disa pacientë të kenë marrë ilaçet por të mos i kenë përdorur, apo mungesa e të dhënave për incidente të lehta që nuk raportohen.
Pavarësisht kësaj, autorët theksojnë rëndësinë e diskutimit të këtyre përfitimeve me pacientët, duke kujtuar se mosmarrja e trajtimit mund të rrisë disa rreziqe serioze. /Gazeta Shneta/