Google dhe NASA po punojnë së bashku për një mjet inteligjence artificiale që do t’i ndihmojë astronautët dhe ekipet mjekësore në Tokë të diagnostikojnë dhe trajtojnë problemet shëndetësore në kohë reale gjatë misioneve në hapësirë.
Quajtur “Crew Medical Officer Digital Assistant”, sistemi do të sigurojë diagnoza dhe opsione trajtimi, veçanërisht kur komunikimi me Tokën është i kufizuar, siç ndodh në misionet drejt Hënës dhe Marsit.
Mjeti do të mbështesë gjithashtu kirurgët e fluturimit, duke ofruar të dhëna dhe analiza parashikuese për vendimmarrje më të saktë, shkruan Euronews transmeton Gazeta Shneta.
Ky zhvillim vjen ndërsa NASA planifikon misionet Artemis II dhe III për kthimin e njeriut në Hënë pas 60 viteve, si dhe misionet e ardhshme drejt Marsit.
Aktualisht, astronautët marrin trajnim mjekësor bazik dhe mbështetje nga ekipe të specializuara në Tokë, por për misionet jashtë orbitës së ulët të Tokës, si ato drejt Hënës ose Marsit, vonesat në komunikim mund të arrijnë deri në 40 minuta, ndërsa një evakuim emergjent mund të zgjasë deri në gjashtë muaj.
Sistemi i ri AI synon të përmirësojë vetë-mjekimin në hapësirë, duke ofruar një mbështetje mjekësore më të pavarur dhe më të sigurt për astronautët në kushtet më të largëta dhe të kërkuara.
Rezultatet fillestare të projektit tregojnë se mjeti mund të bëjë diagnoza të besueshme bazuar në simptomat e raportuara, ndërsa testimet dhe përmirësimet e mëtejshme janë duke u zhvilluar së bashku me mjekët.