Administrata Amerikane e Ushqimit dhe Barnave (FDA) ka miratuar Papzimeos (zopapogene imadenovec-drba), terapinë e parë të aprovuar ndonjëherë për trajtimin e të rriturve me papillomatozë respiratore të përsëritur (RRP) një sëmundje e rrallë dhe e vështirë që deri më sot trajtohej kryesisht me ndërhyrje kirurgjikale të përsëritura.
Papzimeos është një imunoterapi e bazuar në vektor adenoviral, e cila synon drejtpërdrejt proteinat e HPV tipeve 6 dhe 11 – shkaktarët kryesorë të RRP. Ajo administrohet nëpërmjet katër injeksioneve nënlëkurore përgjatë një periudhe 12-javore.
Rezultatet e provave klinike treguan se 50% e pacientëve (18 nga 35) arritën përgjigje të plotë, duke mos pasur më nevojë për operacione gjatë 12 muajve pas trajtimit, shkruan HealthDay transmeton Gazeta Shneta.
Shumica e tyre (15 pacientë) vazhduan të mos shfaqin shenja të sëmundjes edhe pas 24 muajsh. Për më tepër, trajtimi nuk raportoi efekte anësore serioze apo toksicitet që kufizon dozën.
“Ky është një moment historik, pasi për herë të parë pacientët me këtë sëmundje të rrallë kanë në dispozicion një terapi që synon shkakun rrënjësor, jo vetëm simptomat,” deklaroi Helen Sabzevari, presidente dhe CEO e kompanisë Precigen, e cila zhvilloi terapinë.
Ky miratim shënon një hap të madh drejt përmirësimit të cilësisë së jetës për pacientët që deri më tani ishin të varur nga ndërhyrje të shpeshta kirurgjikale për të mbajtur nën kontroll sëmundjen./Gazeta Shneta/