Një studim i ri i kryer nga Mass General Brigham ka zbuluar se mënyra se si ndryshon koha e vakteve tek të moshuarit mund të shërbejë si tregues i rëndësishëm për shëndetin dhe jetëgjatësinë.
Rezultatet, të botuara në revistën Communications Medicine, tregojnë se veçanërisht koha e mëngjesit është e lidhur me shëndetin fizik dhe mendor, si dhe me rrezikun e vdekshmërisë.
Sipas autorit kryesor të studimit, Hassan Dashti, shkencëtar i ushqyerjes dhe biolog cirkadian në Spitalin e Përgjithshëm të Massachusetts, ndryshimet në kohën e vakteve, sidomos në mëngjes, mund të përdoren si “sinjale të hershme” për gjendjen e përgjithshme shëndetësore të të moshuarve.
“Mbajtja e orareve të rregullta të ushqimit mund të bëhet pjesë e strategjive më të gjera për një plakje të shëndetshme dhe jetë më të gjatë”, tha ai.
Studimi u bazua në të dhënat e 2,945 personave në Mbretërinë e Bashkuar, të moshës 42 deri në 94 vjeç, të cilët u ndoqën për më shumë se 20 vjet.
Hulumtuesit zbuluan se me kalimin e viteve, të moshuarit priren ta konsumojnë mëngjesin dhe darkën më vonë, duke ngushtuar gjithashtu periudhën kohore të ushqimit gjatë ditës.
Rezultatet treguan se mëngjesi i vonuar lidhet me probleme shëndetësore si depresioni, lodhja, vështirësitë në përgatitjen e ushqimit, gjumi i dobët dhe problemet me shëndetin oral.
Për më tepër, personat që hanin mëngjes vonë kishin një rrezik më të lartë për vdekje gjatë periudhës së studimit.
Ekspertët theksojnë se këto gjetje janë veçanërisht të rëndësishme pasi ndër të moshuarit po bëhen gjithnjë e më popullore mënyrat e ushqyerjes me orar të kufizuar ose agjërimi i ndërprerë.
“Ajo që mund të jetë e dobishme për të rinjtë, mund të ketë pasoja të ndryshme për shëndetin e të moshuarve,” tha Dashti.
Ky studim e forcon thënien e njohur se “mëngjesi është vakti më i rëndësishëm i ditës” – sidomos për individët në moshë të shtyrë./Gazeta Shneta/