Një studim i ri i zhvilluar nga Instituti për Kërkime në Biomedicinë (IRB Barcelona) ka identifikuar një mekanizëm të ri premtues për trajtimin e obezitetit, duke aktivizuar yndyrën kafe një tip i veçantë i indit dhjamor që nxit djegien e energjisë.
Kërkimi, i publikuar në revistën Nature Communications dhe i udhëhequr nga Dr. Antonio Zorzano dhe Dr. Manuela Sánchez-Feutrie, tregon se proteina neuritin 1, e njohur më parë për rolin e saj në sistemin nervor, luan gjithashtu një funksion kyç në metabolizëm.
Kur niveli i saj rritet në yndyrën kafe, ajo stimulon aktivitetin mitokondrial dhe gjenerimin e nxehtësisë, duke përshpejtuar djegien e energjisë pa ndikuar në oreksin ose aktivitetin fizik, shkruan MedicalXpress transmeton Gazeta Shneta.
Eksperimentet tek kafshët treguan se rritja e neuritin 1 solli ulje të shtimit në peshë, përmirësim të ndjeshmërisë ndaj insulinës dhe zvogëlim të inflamacionit të mëlçisë, edhe kur ato ushqeheshin me dieta të pasura me kalori.
“Ndryshe nga barnat aktuale kundër obezitetit, si Ozempic apo tirzepatide, që veprojnë duke ulur oreksin, neuritin 1 funksionon përmes rritjes së shpenzimit energjetik,” theksoi Dr. Zorzano.
Hulumtuesit nënvizojnë se rezultatet janë ende në faza të hershme dhe nevojiten më shumë studime përpara se kjo qasje të mund të zbatohet tek njerëzit.
Megjithatë, të dhënat gjenetike sugjerojnë një lidhje të drejtpërdrejtë mes neuritin 1 dhe predispozitës ndaj obezitetit, duke e bërë këtë proteinë një kandidat të rëndësishëm për zhvillimin e terapive të reja kundër obezitetit, diabetit të tipit 2 dhe sëmundjeve të mëlçisë./Gazeta Shneta/