Një lëndë ushqyese e zakonshme, e gjetur tek perimet me gjethe jeshile dhe tek misri, mund të bëjë më shumë sesa të mbrojë shikimin.
Hulumtimet e reja tregojnë se zeaksantina, një karotenoid me origjinë bimore, mund të forcojë qelizat imune të trupit që luftojnë kancerin dhe ta bëjë imunoterapinë më efektive, shkruan Health Day transmeton Gazeta Shneta.
Studimi, i publikuar së fundmi në revistën “Cell Reports Medicine”, zbuloi se zeaksantina rrit aftësinë e qelizave imune CD8+ T, të cilat shkatërrojnë tumoret, për të sulmuar kancerin.
Kur u dha në formë orale tek minjtë, kjo lëndë ngadalësoi rritjen e melanomës dhe tumoreve të zorrës së trashë. Ky efekt u zhduk sapo qelizat CD8+ T u eliminuan.
“U befasuam kur zbuluam se zeaksantina, e njohur deri më tani për rolin e saj në shëndetin e syve, ka një funksion krejtësisht të ri në forcimin e imunitetit kundër tumoreve,” tha autori kryesor i studimit, Dr. Jing Chen, profesor i mjekësisë në Universitetin e Çikagos.
“Studimi ynë tregon se një lëndë e thjeshtë ushqyese mund të plotësojë dhe të forcojë trajtimet e avancuara kundër kancerit, si imunoterapia,” shtoi ai.
Zeaksantina është e disponueshme gjerësisht si suplement pa recetë për shëndetin e syve.
Megjithatë, studiuesit theksuan se nevojiten prova klinike për të parë nëse këto përfitime vlejnë edhe për pacientët me kancer. /Gazeta Shneta/