Shtetet e Bashkuara dhe Kina kanë arritur një “marrëveshje kornizë” lidhur me polemikat rreth platformës kineze të mediave sociale TikTok.
Lajmi u bë i ditur nga Sekretari amerikan i Thesarit, Scott Bessent, pas një raundi të ri bisedimesh me zyrtarë të lartë kinezë në Madrid.
“Janë dy palë private në negociatë, por kushtet tregtare janë rënë dakord,” deklaroi Bessent, duke iu referuar marrëveshjes për TikTok pa e përmendur drejtpërdrejt emrin e kompanisë.
Ai zhvilloi takime me zëvendëskryeministrin kinez, He Lifeng, me qëllim ngushtimin e diferencave të theksuara mbi tregtinë dhe teknologjinë, që prej kohësh kanë tensionuar raportet mes dy ekonomive më të mëdha në botë.
Takimet në Madrid pritet të zgjasin deri të mërkurën, pikërisht në afatin e fundit që Uashingtoni i ka vendosur TikTok për të gjetur një blerës të ri – në të kundërt, platformës i kanoset ndalimi i operimit në SHBA.
Presidenti Donald Trump e ka përshëndetur marrëveshjen si një sukses të madh tregtar dhe diplomatik. Në një postim në rrjetin e tij social, Truth, ai shkroi: “Marrëveshje e shkëlqyer tregtare në Evropë midis SHBA-së dhe Kinës.
Shkoi shumë mirë dhe do të përfundohet së shpejti. Është arritur një marrëveshje për një kompani të caktuar që të rinjtë në vendin tonë kanë qenë të dëshpëruar për ta shpëtuar. Ata do të jenë të lumtur.”
Trump gjithashtu njoftoi se do të zhvillojë një bisedë direkte me presidentin kinez Xi Jinping të premten, më 19 shtator, për të diskutuar më tej bashkëpunimin ekonomik dhe tregtinë dypalëshe.
Ky zhvillim shënon raundin e katërt të takimeve midis delegacioneve amerikane dhe kineze në tokën evropiane gjatë katër muajve të fundit. Takimet ndjekin armëpushimin tregtar të arritur në Stokholm në korrik, i cili uli ndjeshëm tarifat reciproke dhe ringjalli eksportet kineze të metaleve të rralla në SHBA.
Megjithatë, pavarësisht përparimeve, Trump ka vendosur të zgjasë tarifat mesatare prej 55% për mallrat kineze deri më 10 nëntor, në një përpjekje për të ruajtur presionin ndaj Pekinit në negociata.
Sipas Bessent, marrëveshja për TikTok përfaqëson një ekuilibër midis nevojës për një treg të hapur dhe garantimit të sigurisë kombëtare.
“Ne donim të siguronim që kjo të ishte një marrëveshje e drejtë për kinezët, por që të respektonte plotësisht shqetësimet e sigurisë kombëtare të SHBA-së. Kjo është marrëveshja që kemi arritur”, tha ai.
Sipas tij, qëllimi i SHBA-së është të garantojë një klimë të drejtë investimesh për investitorët kinezë, por gjithmonë duke vendosur sigurinë kombëtare në plan të parë.