Një raport i publikuar nga organizata UN Watch në Berlin ka akuzuar Agjencinë e OKB-së për Ndihmën dhe Punën për Refugjatët Palestinezë (UNRWA) se ka lejuar Hamasin të radikalizojë breza të tërë fëmijësh palestinezë në Gaza.
Drejtori ekzekutiv i UN Watch, Hillel Neuer, tha në konferencën për media se përmes lidhjeve financiare, operacionale dhe të personelit, UNRWA ka krijuar hapësirë për ndikimin e Hamasit në shkolla. Ai kritikoi gjithashtu vendet donatore, përfshirë Gjermaninë, për mungesë kontrolli, shkruan Euronews transmeton Gazeta Shneta.
Raporti përmend raste të hershme, si ai i vitit 2011 kur sindikata e UNRWA-së në Gaza, nën drejtimin e Suhail Al-Hindi, refuzoi përfshirjen e mësimeve mbi Holokaustin në shkolla. Në vitin 2017, Al-Hindi u lavdërua për qëndrimin e tij kundër këtij programi.
Neuer kërkoi një rishikim ndërkombëtar të plotë dhe reforma gjithëpërfshirëse, duke akuzuar UNRWA-në për “infantilizimin e popullit palestinez”, gjë që sipas tij vetëm sa ushqen varësinë politike dhe pengon stabilitetin afatgjatë.
Nga ana tjetër, Komisioneri i Përgjithshëm i UNRWA-së, Philippe Lazzarini, hodhi poshtë akuzat, duke thënë se Izraeli nuk ka ofruar prova konkrete. Ai paralajmëroi se shkatërrimi i shkollave nga sulmet izraelite po krijon rrezikun e një “gjenerate të humbur” me mbi 660 mijë fëmijë të mbetur pa arsimim.
Izraeli në janar ndaloi aktivitetin e UNRWA-së në territoret palestineze, ndërsa agjencia thotë se vazhdon të përpiqet të ofrojë ndihmë, edhe pse kjo është bërë pothuajse e pamundur për shkak të luftimeve.
UNRWA është themeluar në vitin 1949 dhe ofron ndihmë humanitare, arsim dhe kujdes shëndetësor për miliona palestinezë në Gaza, Bregun Perëndimor dhe shtetet fqinje.