Më shumë se një milion pacientë në Angli çdo vit referohen nga mjekët e tyre drejt aktiviteteve jo-mjekësore – si grupe kopshtarie, klube muzike, mbështetje për strehim ose sporte komunitare – për të përmirësuar mirëqenien e tyre.
Kjo qasje, e njohur si recetë sociale, synon të ndihmojë njerëzit që përballen me probleme shoqërore që ndikojnë drejtpërdrejt shëndetin: vetmi, humbje, vështirësi financiare, punësim ose strehim.
Pacientët lidhen me të ashtuquajturit “link workers”, profesionistë që ndihmojnë në krijimin e planeve individuale për të kapërcyer barrierat. Për shembull, një person i izoluar shoqërisht mund të rekomandohet të kalojë kohë në natyrë me të tjerë, shkruan Euronews Health transmeton Gazeta Shneta.
Kjo metodë, e promovuar prej kohësh si një mënyrë për të ulur kostot shëndetësore dhe për të lehtësuar ngarkesën e sistemit, u bë prioritet i Shërbimit Shëndetësor Kombëtar (NHS) në vitin 2019. Synimi fillestar ishte 900,000 referime deri në vitin 2024, por studimi i ri, botuar në “The Lancet Public Health”, tregon se shifra është tejkaluar ndjeshëm: nga 2019 deri në 2023, mbi 5.5 milionë referime janë bërë nëpërmjet 9.4 milionë vizitave mjekësore.
Aktualisht, në Angli punojnë mbi 3,300 link workers, të cilët konsiderohen thelbësorë për suksesin e programit.
Sipas Charlotte Osborn-Forde nga ‘National Academy for Social Prescribing’, ata ndihmojnë njerëzit të përballen me probleme komplekse që ndikojnë në shëndet, nga stresi për borxhet te depresioni pas humbjes së një të afërmi.
Megjithatë, studimi thekson se ekzistojnë ende pabarazi socio-demografike në akses, sidomos për komunitetet minoritare dhe zonat më të varfra.
Modele të ngjashme janë duke u testuar në mbi 30 vende, përfshirë BE-në, ku kërkimi po shqyrton efektet te refugjatët, të moshuarit e vetmuar dhe komuniteti LGBTQ. /Gazeta Shneta/