Ministria e Shëndetësisë më në fund i ka kategorizuar si shërbime shëndetësore mbjelljen e flokëve, botoksin dhe fillerin.
Përmes një njoftimi për institucionet private shëndetësore, Ministria e Shëndetësisë ka bërë të ditur se nga tani e tutje mbjellja e flokëve, botoksi dhe filleri, do të konsiderohen si shërbime shëndetësore për të cilat nevojiten specialist të licencuar, shkruan Gazeta Shneta.
“Ju informojmë se procedurat mjekësore (mbjellje e flokut, botoksi, filleri) dhe procedura të tjera estetike mund të ofrohen vetëm nga institucionet e licencuara nga Ministria e Shëndetësisë me këto profile: 1. Specialist i kirurgjisë plastike, dermatologjisë, kirurgjisë maksillofaciale dhe ORL”, thuhet në njoftimin e MSh-së.
MSh ka paralajmëruar se çdo institucion apo profesionist që kryen këto shërbime dhe nuk e ka të licencuar institucionin me specialistët e lartë cekur, nuk do të lejohet të kryej këto shërbime.
Deri më tani këto shërbime janë kryer edhe nga profesionistë të tjerë, madje edhe nga persona që nuk kanë të bëjnë fare me profesionin e mjekësisë, sikurse janë parukerie apo frizere. Duke qenë se këto shërbime nuk kanë qenë të kategorizuara si shërbime shëndetësore, nuk kanë qenë as në domenin e Inspektoratit Shëndetësor.
Gazeta Shneta gjatë ditës së djeshme ka raportuar për importimin e botoxit në Kosovë jashtëligjshëm. AKPM i ka konfirmuar Gazetës Shneta se Botoxi duhet të pajiset me Autorizim Marketing, gjë të cilën asnjë kompani nuk e ka bërë deri më tani, e që rrjedhimisht i bie se çdo import i këtij produkti në vendin tonë është i jashtëligjshëm. /Gazeta Shneta/
