Sipas një përkufizimi të ri të propozuar, afro 70% e të rriturve në SHBA do të klasifikoheshin si persona me obezitet.
Tradicionalisht, obeziteti është matur përmes indeksit të masës trupore (BMI), ku një vlerë mbi 30 tregon obezitet. Megjithatë, kjo metodë është kritikuar pasi nuk dallon yndyrën nga muskujt. Për këtë arsye, ekspertët mjekësorë kanë propozuar një qasje të re, shkruan Euronews Health transmeton Gazeta Shneta.
Sipas këtij përkufizimi, një person do të konsiderohej obez nëse ka BMI mbi 40, ose një BMI të lartë të shoqëruar me të paktën një shenjë të tepërt të yndyrës trupore – si bel i gjerë, raport i lartë bel–ije, ose raport i lartë bel–gjatësi.
Edhe individët me BMI “normal” mund të konsiderohen obezë nëse kanë dy tregues të yndyrës së tepërt, ose nëse skanimet trupore zbulojnë depozitim të lartë yndyre.
Obeziteti do të ndahet në dy kategori: klinik, kur shfaqen ndërlikime shëndetësore, dhe para-klinik, kur ende nuk ka pasoja të dukshme.
Duke aplikuar këtë përkufizim mbi një mostër prej mbi 300,000 të rriturish amerikanë, studiuesit zbuluan se përhapja e obezitetit rritet nga 43% në 69%. Tek të moshuarit mbi 70 vjeç, pothuajse 8 nga 10 do të klasifikoheshin si obezë.
Studimi, botuar në “JAMA Network Open”, tregoi se pothuajse të gjithë ata që konsideroheshin obezë me metodën e vjetër, përfshiheshin edhe në përkufizimin e ri. Rreth 78,000 persona që më parë nuk llogariteshin si të tillë, tani hyjnë në këtë kategori – gati gjysma me obezitet klinik.
Në Europë, sipas Këshillit Europian të Informacionit rreth Ushqimit, normat e mbipeshës dhe obezitetit po rriten gjithashtu.
Rumania (38%), Malta dhe Hungaria (36%) kanë përqindjet më të larta te meshkujt, ndërsa Franca (10%) dhe Danimarka (16%) renditen më poshtë. Tek gratë, përqindjet më të larta janë në Rumani (32%) dhe Malta (29%), ndërsa më të ulëtat në Francë (10%) dhe Danimarkë (11%). /Gazeta Shneta/