Mungesa e vitaminës D lidhet me një rrezik më të lartë për zhvillimin e rakitit, osteomalacisë, sëmundjeve kardiovaskulare dhe çrregullimeve autoimune. Ekzistojnë dy forma kryesore të kësaj vitamine – vitamina D2 dhe D3 – të cilat përdoren si suplemente ushqimore për të trajtuar mungesën e saj.
Një meta-analizë e re, e bazuar në të dhëna nga disa studime të kontrolluara me përzgjedhje të rastësishme, ka treguar se vitamina D2 mund të ulë nivelet e vitaminës D3 në gjak. Këto rezultate sugjerojnë se suplementet me vitaminë D3 janë më të dobishme, shkruan burimi Medical News Today transmeton Gazeta Shneta.
Mungesa e vitaminës D është një problem i përhapur globalisht, me rreth një në katër persona në Shtetet e Bashkuara që vuajnë nga nivele të ulëta deri në mungesë të theksuar.
Vitamina D është thelbësore për shëndetin e kockave dhe metabolizmin e kalciumit, ndërsa mungesa e saj është lidhur edhe me rrezik më të lartë për sëmundje të zemrës, kancer, diabet dhe depresion.
Trupi i njeriut mund të prodhojë vetë vitaminë D3 përmes ekspozimit në diell, ndërsa pjesa tjetër sigurohet nga ushqimi ose suplementet. Megjithatë, efektiviteti i dy formave të saj – D2 (ergokalciferol) dhe D3 (kolekalciferol) – ka qenë subjekt debatesh shkencore.
Të dhënat e fundit tregojnë se vitamina D3 mund të ofrojë përfitime më të mëdha në uljen e vdekshmërisë nga kanceri, forcimin e sistemit imunitar dhe përmirësimin e humorit.
Meta-analiza në “Nutrition Reviews”, që përfshiu 11 studime të rastësishme, zbuloi se pjesëmarrësit që morën vitaminë D2 patën një ulje më të madhe të niveleve të D3 krahasuar me ata që nuk morën suplemente. /Gazeta Shneta/