Mbajtja e armëpushimit në Gaza është thelbësore për ofrimin e ndihmës humanitare që shpëton jetë në territor, thanë të martën Kombet e Bashkuara, duke përsëritur një thirrje për hapjen e të gjitha kalimeve kufitare.
“Ruajtja e armëpushimit është jetike; në të vërtetë është e vetmja mënyrë që mund të shpëtojmë jetë”, tha Abeer Etefa, zëdhënëse e Programit Botëror të Ushqimit të OKB-së për Lindjen e Mesme, në një konferencë për shtyp në Gjenevë.
“E dimë që është një armëpushim i brishtë; gjëja më e rëndësishme është që të zgjasë.”
Etefa tha se që nga hyrja në fuqi e armëpushimit, 530 kamionë të WFP-së kishin kaluar në Gaza, duke sjellë më shumë se 6,700 ton ushqim, të cilat ajo tha se ishin “të mjaftueshme për gati gjysmë milioni njerëz për dy javë”.
“Kovanet po kalojnë përpara, ushqimi po arrin në depo dhe shpërndarjet po ndodhin në një mënyrë të organizuar dhe dinjitoze”, tha ajo
.Etefa shtoi se WFP nuk kishte parë plaçkitje të konvojeve të saj që nga armëpushimi.
Zëdhënësja tha se WFP tani ka 26 pika shpërndarjeje ushqimesh të hapura në Gaza — nga pesë të premten, por ende shumë më pak se 145 që shpreson të ketë në të gjithë territorin. Shumica janë në jug dhe në qendër të Rripit.
“Njerëzit po shfaqen në numër të madh” në pikat e shpërndarjes, tha Etefa.Ajo tha se vetëm kalimet kufitare Kerem Shalom dhe Kissufim ishin të hapura, por bëri thirrje që të hapet çdo pikë hyrjeje në territorin palestinez, veçanërisht ato në veri, ku situata e ushqimit “është jashtëzakonisht e rëndë”.
“Nuk kemi një tregues se kur do të hapen ato pika kufitare”, tha ajo, duke shtuar:
“Nuk kemi arritur në pikën ku Gaza është e përmbytur me ushqim”.