Një studim i ri nga Universiteti i Kalifornisë në San Diego (UC San Diego) ka zbuluar një lidhje të papritur midis lëvizjeve ritmike të zorrëve dhe koordinimit të enëve të gjakut në tru, duke sugjeruar se sistemi tretës mund të ndihmojë në shpjegimin e mënyrës se si truri ruan harmoninë e funksioneve të tij biologjike.
Rezultatet, të publikuara në revistën shkencore Physical Review Letters, tregojnë se ritmet natyrore të zorrëve të cilat ndihmojnë në lëvizjen e ushqimit përmes traktit tretës, ndjekin një model të quajtur “efekti i shkallëve”, që mund të shpjegojë mënyrën se si enët e gjakut në tru zgjerojnë dhe kontraktohen në mënyrë të sinkronizuar.
Kur neuronet në tru aktivizohen, arteriolet – enë të vogla gjaku që furnizojnë trurin me oksigjen – zmadhohen për të rritur furnizimin me oksigjen dhe lëndë ushqyese. Këto enë pulsojnë në ritme të koordinuara, por deri tani shkencëtarët nuk e dinin se si arrihej kjo sinkroni, shkruan MedicalXpress transmeton Gazeta Shneta.
Sipas studiuesve, zorrët funksionojnë në të njëjtin parim si truri: pjesë të ndryshme të tyre komunikojnë përmes valëve ritmike, duke krijuar lëvizje të harmonizuara. “Çdo pjesë e zorrës është si një ‘oscilator’ që flet me pjesët përreth saj,” shpjegoi profesori Massimo Vergassola, një nga autorët kryesorë të studimit.
Ekipi përdori modele matematikore për të treguar se këto “oscilatorë” – në tru apo në zorrë – mund të lidhen me njëri-tjetrin kur kanë frekuenca të ngjashme, duke krijuar një koordinim natyror të ritmeve.
“Ky është një zbulim i rëndësishëm, sepse tregon se si ndodhin ndërprerjet dhe riekuilibrimet në këto ritme biologjike,” tha David Kleinfeld, profesor i fizikës dhe neurobiologjisë në UC San Diego.
Sipas studiuesve, këto rezultate mund të ndihmojnë në kuptimin më të mirë jo vetëm të funksioneve të trurit, por edhe të çrregullimeve të tretjes që ndikojnë në lëvizjen e ushqimit dhe lëngjeve në traktin gastrointestinal.
“Truri është shumë më kompleks se zorrët, por ky është thelbi i shkencës,” shtoi Kleinfeld. “Ne ndjekim një pyetje, dhe ajo na çon drejt një tjetër – derisa të kuptojmë më mirë mënyrën se si trupi ynë funksionon në tërësi.”/Gazeta Shneta/