Numri i vdekjeve amtare në botë ra në rreth 260,000 në vitin 2023, një ulje prej 41% krahasuar me fillimin e shekullit. Një analizë e re globale tregon se përdorimi i kontraceptivëve parandalon mijëra vdekje çdo vit, duke luajtur rol kyç në këtë rënie historike.
Vdekjet amtare – që ndodhin gjatë shtatzënisë, lindjes ose brenda gjashtë javëve pas saj – shkaktohen kryesisht nga hemorragjitë pas lindjes, hipertensioni, sepsa, bllokimet e enëve të gjakut, komplikimet nga abortet dhe lindjet e vështira, shkruan burimi Euronews Health transmeton Gazeta Shneta.
Sipas studimit të botuar në “The Lancet Global Health”, studiues nga Organizata Botërore e Shëndetësisë (OBSH) dhe disa universitete kryesore analizuan të dhëna nga 195 vende.
Ata zbuluan se 61.2% e uljes së vdekjeve u shpjegua me përmirësimin e kujdesit obstetrik – përfshirë ndihmën nga personel i kualifikuar gjatë lindjes dhe kujdesin pas lindjes – ndërsa 38.8% u atribuohet uljes së fertilitetit përmes përdorimit të kontraceptivëve dhe aborteve më të sigurta.
Vetëm përdorimi i kontraceptivëve ka shmangur rreth 77,400 vdekje amtare në vitin 2023, që përbën një në katër jetë të shpëtuara.
Sipas Pascale Allotey nga OBSH, qasja në planifikim familjar dhe kujdes cilësor gjatë shtatzënisë “nuk janë thjesht ndërhyrje shëndetësore, por mënyra thelbësore për të shpëtuar jetë dhe për të avancuar barazinë gjinore.”
Megjithatë, studiuesit paralajmërojnë se kufizimet ndaj abortit dhe shkurtimet e fondeve ndërkombëtare, si ato të USAID, mund të rrezikojnë këtë përparim.
Ata kërkojnë integrim më të fortë midis kujdesit obstetrik dhe planifikimit familjar, për të siguruar që çdo grua të ketë qasje në kujdes të sigurt dhe të barabartë. /Gazeta Shneta/