Një grup studiuesish në Madrid ka zhvilluar një teknikë të re kundër kancerit, e cila shkatërron qelizat kancerogjene nga brenda vetë tumorit, duke përdorur dritë lazer dhe substanca të miratuara klinikisht.
Metoda bazohet në një trajtim të njohur si terapia fotodinamike, e cila përdoret tashmë për disa lloje kanceri. Në këtë terapi, pacientit i jepen substanca ndjeshme ndaj dritës, të cilat aktivizohen kur ndriçohen me lazer, duke shkatërruar qelizat kancerogjene.
Sipas MedicalXpres, studiuesit nga Instituti IMDEA Nanociencia dhe Qendra Kombëtare për Bioteknologji (CNB-CSIC) kanë shkuar një hap më tej: në vend që të ndriçohet i gjithë tumori, ata kanë drejtuar lazerin vetëm në një qelizë të vetme tumorale.
Rezultati ishte i jashtëzakonshëm — drita aktivizoi një zinxhir reagimesh që shkatërroi edhe qelizat përreth, duke e “çaktivizuar” të gjithë tumorin brenda pak minutash. Ky proces ndodh për shkak të një fenomeni të quajtur “efekti bystander”, ku qelizat e dëmtuara dërgojnë sinjale që bëjnë edhe qelizat fqinje të vdesin.
Sipas Dr. Sebastián Thompson, bashkautor i studimit, kjo teknikë është shumë premtuese, sepse përdor substanca dhe dritë që tashmë janë të aprovuara për përdorim mjekësor, duke e bërë më të lehtë testimin në pacientë në të ardhmen.
“Ne po arrijmë ta shkatërrojmë tumorin nga brenda – një mënyrë krejt e re për të luftuar kancerin,” tha ai.
Autorja kryesore e studimit, Cristina Carrizo, shtoi se hapi i ardhshëm është testimi në modele shtazore, për të siguruar që qelizat e shëndetshme të mos dëmtohen./Gazeta Shneta/