Miliona të rritur në Shtetet e Bashkuara po përballen me COVID-in e zgjatur, dhe rreth 20% e tyre përjetojnë simptoma aq të rënda sa pengojnë aktivitetet e përditshme, sipas një raporti të ri nga Qendrat për Kontrollin dhe Parandalimin e Sëmundjeve (CDC).
Sipas raportit, simptomat më të zakonshme përfshijnë lodhje ekstreme, vështirësi në përqendrim, kollë të vazhdueshme dhe rrahje të shpejta të zemrës. COVID-i i zgjatur mund të përfshijë gjithashtu probleme me frymëmarrjen, çrregullime të gjumit, depresion, ankth, dhimbje kyçesh dhe probleme me tretjen.
CDC thekson se shumica e njerëzve përmirësohen brenda tre muajsh, megjithatë disa kanë nevojë për deri në gjashtë muaj për rikuperim të plotë, shkruan Medical News Today transmeton Gazeta Shneta.
Një studim i ri, i udhëhequr nga Nicole Ford nga Qendra Kombëtare për Imunizim dhe Sëmundje Respiratore, analizoi të dhëna federale të vitit 2023 dhe zbuloi se 1 në çdo 16 të rritur amerikanë (6.4%) raportoi simptoma të COVID-it të zgjatur që zgjatën më shumë se tre muaj pas infektimit.
Ndër pjesëmarrësit me COVID të zgjatur, rreth 20% raportuan kufizime të mëdha në aktivitetet e përditshme si ecja, blerjet apo punët e shtëpisë. Këto rezultate sugjerojnë se shumë persona që vuajnë nga kjo gjendje kanë nevojë për mbështetje të vazhdueshme mjekësore dhe lehtësime në vendin e punës për të ndihmuar procesin e rikuperimit.
Studimi u publikua më 19 dhjetor në revistën shkencore të CDC-së, “Morbidity and Mortality Weekly Report”, duke theksuar rëndësinë e njohjes dhe trajtimit të COVID-it të zgjatur si një sfidë madhore shëndetësore publike. /Gazeta Shneta/