Administrata e Ushqimit dhe Barnave e SHBA-së (FDA) ka njoftuar të premten kufizimin e përdorimit të suplementeve me fluor që përdoren për të forcuar dhëmbët e fëmijëve, duke përfaqësuar një nga hapat më të fundit të ndërmarrë nga Sekretari i Shëndetësisë, Robert F. Kennedy Jr.
Sipas rregullave të reja, produktet me fluor nuk rekomandohen më për fëmijët nën moshën 3 vjeç, dhe as për fëmijët më të rritur që nuk kanë rrezik të lartë për prishjen e dhëmbëve. Më herët, këto suplemente ishin të përshkruara që nga mosha gjashtë muajsh, shkruan AP News, transmeton Gazeta Shneta.
Në vend që të kërkojë tërheqjen e plotë të produkteve nga tregu, FDA u ka dërguar letra paralajmëruese katër kompanive farmaceutike, duke i urdhëruar që të ndalojnë tregtimin e tabletave dhe pikave me fluor që nuk janë të miratuara nga agjencia. Këto produkte janë përdorur shpesh për fëmijët dhe adoleshentët që kanë rrezik të lartë për prishjen e dhëmbëve, sidomos në zonat ku uji përmban pak fluor.
Në deklaratën e saj, FDA theksoi se siguria dhe efektiviteti i këtyre suplementeve nuk janë provuar, ndërsa disa studime të reja kanë ngritur shqetësime për ndikimin e ekspozimit të hershëm ndaj fluorit në zhvillimin e trurit dhe mikrobiomën e zorrëve./ Gazeta Shneta/