Një raport i publikuar më 12 nëntor 2025 nga KFF Health News nxjerr në pah lidhjen e fortë midis përqendrimeve të larta të ndotjes së ajrit dhe rritjes së riskut për zhvillimin e sëmundjeve të demencës.
Studimet tregojnë se ekspozimi i vazhdueshëm ndaj ndotësve të ajrit, si grimcat e imëta PM2.5 dhe ndotës të tjerë industrialë, mund të shkaktojë inflamacion të trurit dhe dëmtime graduale të funksioneve kognitive, shkruan KFF Health, transmeton Gazeta Shneta.
Sipas raportit, efektet negative janë më të shprehura tek të moshuarit, të cilët janë më të ndjeshëm ndaj inflamacionit dhe stresit oksidativ në tru. Ekspertët shpjegojnë se ndotja e ajrit mund të kontribuojë në dëmtimin e qelizave nervore dhe të rrjeteve neuronale, duke nxitur humbje të kujtesës, vështirësi në të menduar dhe problemet e të nxënit, që shpesh shfaqen si shenja të hershme të demencës.
Autorët e raportit nënvizojnë gjithashtu se politikat publike për përmirësimin e cilësisë së ajrit dhe mbrojtjen e popullatës vulnerabël janë të domosdoshme. Masat e rekomanduara përfshijnë rregullime më të rrepta të emetimeve industriale, promovimin e transportit ekologjik, dhe krijimin e zonave të pastra të ajrit në qytete. Për më tepër, ndërgjegjësimi i komunitetit dhe monitorimi i vazhdueshëm i cilësisë së ajrit mund të ndihmojnë në parandalimin e ndikimeve negative të ndotjes mbi shëndetin mendor.
Ky studim nxjerr në pah një problem serioz shëndetësor global dhe thekson nevojën urgjente për ndërhyrje që të mbrojnë trurin dhe funksionet kognitive të të moshuarve.