Europa po përballet me një rritje shqetësuese të infeksioneve të shkaktuara nga bakteret rezistente ndaj barnave, që mund të “rregresojnë dekada përparimi mjekësor”, paralajmërojnë autoritetet shëndetësore.
Rezistenca antimikrobiale ndodh kur bakteret dhe viruset zhvillojnë aftësinë për t’i shmangur barnave ekzistuese, duke e bërë trajtimin më të vështirë dhe procedurat mjekësore si transplantet e organeve apo trajtimi i kancerit më të rrezikshme.
Sipas Qendrës Evropiane për Parandalimin dhe Kontrollin e Sëmundjeve (ECDC), AMR shkakton mbi 35,000 vdekje çdo vit në BE, Islandë, Lihtenshtajn dhe Norvegji, shkruan Euronews përcjell Gazeta Shneta.
ECDC identifikon disa faktorë që krijojnë një “stuhi të përkryer”: popullsi e plakur më e ndjeshme ndaj infeksioneve, përhapje ndërkufitare e patogjenëve rezistentë, përdorim i tepruar i antibiotikëve dhe boshllëqe në kontrollet e infeksioneve.
Raporti tregon se që nga viti 2019, infeksionet nga bakteret rezistente ndaj karbapenemeve si Klebsiella pneumoniae janë rritur mbi 60%, ndërsa infeksionet nga një variant rezistent i E. coli janë rritur mbi 5%, duke mos arritur objektivat e vendosura nga BE-ja.
Ndërkohë, përdorimi i antibiotikëve nga qytetarët evropianë është rritur, shpesh duke përdorur barna që duhet të jenë zgjidhje e fundit.
Drejtoresha e ECDC, Dr. Pamela Rendi-Wagner, thekson se duhet të investohet më shumë në përdorimin e përgjegjshëm të antibiotikëve, kontrollin e infeksioneve dhe zhvillimin e barnave të reja. “Përballja me AMR kërkon inovacion të rëndësishëm,” tha ajo./Gazeta Shneta/