Ilaçet agoniste të GLP-1, si Ozempic, të njohura kryesisht për menaxhimin e diabetit të tipit 2 dhe humbjen në peshë, po tregojnë përfitime të reja shëndetësore përtej përdorimit të tyre tradicional.
Studimet e fundit kanë sugjeruar se këto medikamente mund të lidhen me një rrezik më të ulët të disa llojeve të kancerit, përfshirë kancerin kolorektal, shkruan burimi Medical News Today transmeton Gazeta Shneta.
Një hulumtim i ri ka zbuluar se përdoruesit e ilaçeve GLP-1 që vuajnë nga kanceri i zorrës së trashë mund të kenë një rrezik më të ulët vdekshmërie.
GLP-1 agonistët po studiohen gjithnjë e më shumë për efektet e tyre në shëndetin e zemrës, veshkave dhe trurit, duke treguar ndikime pozitive përtej kontrollit të sheqerit në gjak.
Studimet e mëparshme kanë treguar se këto ilaçe mund të ulin rrezikun e disa kancereve, si kanceri endometrial, ovarian dhe kolorektal.
Sipas Raphael Cuomo, profesor në shkollën e mjekësisë të UC San Diego, GLP-1 agonistët janë “biologjikisht pleiotropikë”.
Kjo do të thotë se, përveç uljes së glukozës dhe peshës trupore, ata ndikojnë në inflamacionin, funksionimin kardiovaskular, zbrazjen e stomakut dhe potencialisht në biologjinë e tumoreve.
Për këtë arsye, kuptimi i efekteve të tyre jashtë kontrollit të sheqerit po bëhet i rëndësishëm për shëndetin publik.
Studimi më i fundit i drejtuar nga Cuomo, i botuar në “Cancer Investigation”, shton prova të reja që medikamentet GLP-1 mund të ndihmojnë në uljen e rrezikut të vdekshmërisë tek personat me kancer të zorrës së trashë.
Këto gjetje mund të hapin rrugën për përdorime të reja terapeutike të kësaj klase medikamentesh. /Gazeta Shneta/