Një analizë e të dhënave të publikuara në revistën “British Journal of Sports Medicine”, tregon se forca muskulore dhe gjendja e mirë fizike lidhen me një rrezik të ndjeshëm më të ulët të vdekjes te pacientët me kancer.
Studiuesit sugjerojnë se stërvitja e përshtatur për të përmirësuar forcën muskulore dhe aftësinë kardiorespiratore mund të rrisë shanset për mbijetesë, shkruan Medical News Today transmeton Gazeta Shneta.
Vetëm në vitin 2022, rreth 20 milionë njerëz u diagnostikuan me kancer globalisht, dhe afërsisht 10 milionë humbën jetën nga kjo sëmundje. Edhe pse ka përparime të mëdha në diagnostikim dhe trajtim, efektet anësore të terapive mund të ndikojnë në zemër, muskuj dhe mbijetesën e pacientëve.
Studiuesit analizuan 42 studime, duke përfshirë rreth 47,000 pacientë (mesatarisht 64 vjeç) me lloje dhe faza të ndryshme të kancerit.
Forca muskulore u vlerësua përmes shtrëngimit të dorës, ndërsa aftësia kardiorespiratore përmes testit kardiopulmonar (CPET) ose testit të ecjes 6-minutëshe.
Analiza tregoi se nivelet më të larta të forcës dhe gjendjes fizike lidhen me një rrezik më të ulët të vdekjes nga çdo shkak dhe veçanërisht nga kanceri.
Kombinimi i forcës dhe gjendjes së mirë fizike lidhet me një rrezik 8–46% më të ulët të vdekjes nga çdo shkak te pacientët me kancer të avancuar (fazat 3 dhe 4) dhe me një rrezik 19–41% më të ulët te ata me kancer të mushkërive ose të sistemit tretës.
Ky studim thekson rëndësinë e aktivitetit fizik të përshtatur si pjesë e kujdesit të integruar për pacientët me kancer, duke ofruar një mjet të thjeshtë dhe efektiv për përmirësimin e mbijetesës. /Gazeta Shneta/