Mungesa e një kure për demencën e bën të domosdoshme identifikimin e faktorëve të modifikueshëm që mund të ulin rrezikun e gjendjes.
Një studim i ri tregon se humbja e lehtë ose më e madhe e dëgjimit në moshën e mesme lidhet me një rritje prej 71% të rrezikut për demencë gjatë një periudhe 15-vjeçare, shkruan Medical News Today transmeton Gazeta Shneta.
Personat me humbje dëgjimi shfaqnin gjithashtu mangësi njohëse dhe nivele më të larta të shenjave të trurit që lidhen me demencën.
Humbja e dëgjimit e lidhur me moshën është e zakonshme, duke prekur rreth dy nga tre të rritur mbi 70 vjeç.
Dikur konsiderohej një gjendje e padëmshme, por sot dihet se ajo shoqërohet me izolim social dhe rënie të funksioneve njohëse.
Studimi i botuar në “JAMA Network Open”, tregon gjithashtu se përdorimi i aparateve të dëgjimit ul rrezikun e demencës te personat që kanë probleme dëgjimi, duke nënvizuar rëndësinë e diagnostikimit dhe trajtimit të hershëm
Sipas Organizatës Botërore të Shëndetësisë, rreth 57 milionë njerëz në botë jetojnë me demencë, dhe çdo vit shtohen rreth 10 milionë raste të reja. Në shumicën e rasteve, demenca rezulton nga ndërveprimi i faktorëve gjenetikë me faktorët mjedisorë të modifikueshëm. Në këtë grup përfshihen presioni i lartë i gjakut, kolesteroli, izolimi social, arsimi, konsumimi i alkoolit dhe duhanpirja.
Hulumtimet e fundit tregojnë gjithnjë e më shumë një lidhje të fortë midis humbjes së dëgjimit dhe rrezikut të demencës.
Megjithëse studimet e mëparshme analizuan vetëm funksionet njohëse ose imazherinë e trurit, studimi i ri i kombinon të dyja, duke ofruar një vështrim më të plotë mbi mënyrën se si humbja e dëgjimit kontribuon në plakjen e trurit dhe rrezikun e demencës. /Gazeta Shneta/