Një studim i ri sugjeron se personat që flenë dhe zgjohen vonë—të njohur si “bufat e natës”—mund të jenë më të prirur ndaj disa rreziqeve shëndetësore krahasuar me ata që ndjekin një rutinë më të hershme të gjumit.
Sipas studimit, faktorët e pashëndetshëm të stilit të jetesës, si mungesa e aktivitetit fizik dhe duhanpirja, u shfaqën më shpesh te individët që rrinë zgjuar deri vonë, krahasuar me “zogjtë e mëngjesit”, të cilët zgjohen herët dhe ndihen më energjikë në orët e para të ditës.
Cilësia e gjumit është një element i rëndësishëm për shëndetin e përgjithshëm, por studimi i publikuar në “Annals of Internal Medicine” tregon se edhe koha e gjumit, jo vetëm sasia, mund të ndikojë në mirëqenie. Kjo lidhet ngushtë me kronotipin—prirjen natyrale të trupit për t’u zgjuar ose fjetur në një orar të caktuar.
Kronotipi ndikon në ritmet biologjike, oreksin, energjinë dhe madje edhe në temperaturën e trupit. Studiuesit zbuluan se ata me kronotip të natës kishin deri në 72% më shumë rrezik për të zhvilluar diabet, krahasuar me individët që zgjohen herët.
Sipas autores kryesore, Dr. Sina Kianersi, ky rrezik shtohet edhe nga prirja e “bufave të natës” për të pasur zakone më pak të shëndetshme, si aktivitet i ulët fizik dhe konsum i shtuar i duhanit.
Megjithëse kronotipi është pjesërisht i përcaktuar nga biologjia, studiuesit theksojnë se përmirësimi i zakoneve të përditshme mund të zvogëlojë rreziqet dhe të përmirësojë shëndetin afatgjatë. /Gazeta Shneta/