Zyra Kombëtare e Auditimit (ZKA) ka gjetur probleme të shumta në procesin e ndërtimit të objektit për Klinikat Nefrologji dhe Hemato-Onkologji në Shërbimin Spitalor dhe Klinik Universitar të Kosovës gjatë periudhës 2018 – qershor 2025.
Në raportin e punlikuar gjatë ditës së sotme, i titulluar “Ndërtimi i objektit për Klinikat Nefrologji dhe Hemato-Onkologji”, analizon të gjithë procesin e ndërtimit – nga buxhetimi dhe planifikimi, procedurat e tenderimit, deri tek menaxhimi i fondeve dhe zbatimi i kontratës, transmeton Gazeta Shneta.
Sipas raportit, janë identifikuar probleme në planifikimin buxhetor, përfshirë mospërputhje mes dokumentacionit teknik dhe paramasave të projektit. Po ashtu, janë evidentuar dyfishime dhe pasaktësi në hartimin e specifikave teknike, si dhe mangësi gjatë vlerësimit të ofertave në fazën e tenderimit. Dobësi janë vërejtur edhe në menaxhimin e shpenzimeve dhe kontrollin e brendshëm.
Auditorja e Përgjithshme, Vlora Spanca, ka theksuar se këto gjetje nënvizojnë nevojën për respektim më rigoroz të kornizës ligjore dhe për një qasje më të sistematizuar në menaxhimin e projekteve të investimeve publike, në mënyrë që të rritet transparenca, integriteti dhe llogaridhënia.
Në fund, ZKA-ja ka propozuar pesë masa për përmirësim.
“Forcim i kontrolleve të brendshme për harmonizimin e buxhetimit dhe transparencës financiare; Mbikëqyrje më efektive të njësive kërkuese dhe prokurimit për të siguruar specifika teknike të sakta; Përmirësim të kontrollit gjatë hartimit të paramasës për të shmangur mospërputhjet me dokumentacionin teknik; Verifikim të plotë të ofertuesve, duke i shpallur të përgjegjshëm vetëm ata që plotësojnë kërkesat e dosjes së tenderit; Ndarje të qartë të fondeve dhe shpenzimeve për secilin projekt dhe forcim të mekanizmave të kontrollit të brendshëm që gabimet të identifikohen në fazat e hershme”