Një hulumtim i ri tregon se kompanitë e duhanit po ndikojnë fshehurazi në politikat e Bashkimit Evropian, për shkak të mungesës së transparencës.
Sipas raportit të organizatave STOP dhe Contre-Feu, institucionet evropiane kanë zhvilluar takime të papublikuara me përfaqësues të industrisë së duhanit, duke shkelur rregullat e veta për transparencën.
Analiza zbuloi se ndërmjet 2023 dhe 2024, zyrtarët e Drejtorisë së Përgjithshme për Tregtinë të Komisionit Evropian kanë zhvilluar takime me industrinë, të cilat nuk janë regjistruar në Regjistrin e Transparencës së BE-së ose në faqen e zyrës, shkruan Euronews transmeton Gazeta Shneta.
Këto praktika krijojnë mundësi për ndikim të fshehtë, veçanërisht në çështje si ligjet shëndetësore, marrëveshjet tregtare dhe produktet e reja të duhanit dhe nikotinës.
Raporti thekson se Philip Morris International (PMI) ka përdorur email-e dhe takime për të ndikuar në vendimet tregtare të BE-së, duke argumentuar se ndalimet ose taksat mbi produktet e duhanit të ngrohur mund të krijojnë barriera tregtare.
Organizatat STOP dhe Contre-Feu paralajmërojnë se industria e duhanit është gjithnjë e pranishme në Bruksel, me qindra lobbyistë dhe një buxhet vjetor prej rreth 14 milionë eurosh për të ndikuar politikat e BE-së.
Komisioni Evropian deklaroi se takimet me industrinë e duhanit shmangen “përveç në rastet kur janë absolutisht të nevojshme” dhe se çdo takim dokumentohet sipas procedurave.
Ekspertët e shëndetit dhe organizatat për transparencë kërkojnë rregulla më të forta për të mbrojtur proceset vendimmarrëse nga ndikimi komercial i industrisë së duhanit./Gazeta Shneta./