Federata e Sindikatave të Shëndetësisë së Kosovës (FSSHK) ka dënuar ashpër incidentin e ndodhur në Spitalin e Përgjithshëm “Dr. Sami Haxhibeqiri” në Mitrovicë, ku një infermiere dhe dy punonjës të sigurimit janë sulmuar fizikisht gjatë ushtrimit të detyrës së tyre.
Në reagimin e saj, FSSHK thekson se ky rast nuk është i izoluar, por pasojë e drejtpërdrejtë e dështimit institucional për të garantuar siguri minimale për punëtorët shëndetësorë në vendin e punës.
Sipas FSSHK, dhuna ndaj stafit shëndetësor është shndërruar në një dukuri shqetësuese, ndërsa tolerimi i saj nga institucionet përgjegjëse konsiderohet i papranueshëm.
FSSHK ka kërkuar nga Policia e Kosovës dhe Prokuroria e Shtetit që rasti të trajtohet me prioritet dhe përgjegjësit të ndëshkohen pa vonesa.
Po ashtu, FSSHK ka bërë thirrje ndaj Ministrisë së Shëndetësisë dhe Shërbimit Spitalor dhe Klinik Universitar të Kosovës që të mbajnë përgjegjësi institucionale dhe të ndërmarrin masa urgjente për rritjen e sigurisë në të gjitha institucionet shëndetësore publike.
“Punëtorët shëndetësorë nuk janë dhe nuk do të jenë shënjestër e dhunës për shkak të mungesave sistemore dhe keqmenaxhimit institucional”, thuhet në reagimin e FSSHK-së.
FSSHKka shprehur solidaritet të plotë me infermieren dhe punonjësit e sulmuar, duke paralajmëruar se do të ndërmarrë veprime sindikale nëse institucionet përgjegjëse vazhdojnë të mos e trajtojnë seriozisht çështjen e sigurisë së stafit shëndetësor./Gazeta Shneta/